„ევროსაბჭოს თავმჯდომარეობას საქართველო საარჩევნო რეფორმის მარცხის, რეპრესიული მანქანის გაძლიერების და ჩვენი ექიმის უკანონო დატყვევების პირობებში ხვდება“, - ამის შესახებ დამოუკიდებელმა დეპუტატმა ეკა ბესელიამ ჟურნალისტებს დღეს გამართულ ღონისძიებასთან დაკავშირებით განუცხადა. მისივე თქმით, ამ ფონზე განსაკუთრებით მძიმეა ზეიმი.
„ვაჟა გაფრინდაშვილის გასათავისუფლებლად საჭიროა მთელი ძალისხმევა და ხელისუფლების მხრიდან ყველა ინსტრუმენტის გამოყენება. პირველი ამით უნდა იყოს ქვეყანა დაკავებული და ნაკლებად უნდა ეზეიმებოდეთ. შეიძლება მოკრძალებულად იმის აღნიშვნა, რომ რიგითობით საქართველო ევროსაბჭოს თავმჯდომარე გახდა, მაგრამ ქვეყანა ამ მოვლენებს სასამართლო რეფორმის, საარჩევნო რეფორმის მარცხის, რეპრესიული მანქანის გაძლიერების და ჩვენი ექიმის უკანონო დატყვევების პირობებში ხვდება. ამ ფონზე განსაკუთრებით მძიმეა გეზეიმებოდეს და ასეთ მასშტაბურ ღონისძიებას აწყობდე. ეს იმდენად არათავსებადია, რომ ძალიან მძიმე შთაბეჭდილებას ტოვებს“, - განაცხადა ბესელიამ.