"ზურაბიშვილი - ბიძინას დანაშაული", - ამ სლოგანით სასტუმრო "ბილტმორთან" მოძრაობა "შეცვალე" აქციას მართავს.
სასტუმროში ევროპის საბჭოს საპარლამენტო ასამბლეის კონფერენცია მიმდინარეობს თემაზე: "დისპორის აქტიური მონაწილეობა სახელმწიფოს აღმშენებლობის პროცესში", რომელსაც პრეზიდენტი სალომე ზურაბიშვილი ესწრება.
აქციის ერთ-ერთი მონაწილის, ნიკა ფარულავას განცხადებით, ერთი წელი გავიდა, რაც ზურაბიშვილი პრეზიდენტი გახდა და ეს ერთი წელი სამარცხვინოა საქართველოს ისტორიაში.
"მოვედით, რომ მივულოცოთ მას ეს სამარცხვინო ერთი წელი. ეს იყო საქართველოს პრეზიდენტების ისტორიაში ყველაზე სამარცხვინო ერთი წელი. მოვუტანეთ საქართველოს კონსტიტუცია, რათა მას ვუთხრათ, რომ ის უნდა ემსახურებოდეს საქართველოს და არა ბიძინა ივანიშვილის ინტერესების გატარებას. სალომე ზურაბიშვილი არ არის ქართველი ხალხის პრეზიდენტი, ის არის ბიძინა ივანიშვილის დანაშაული ქართველი ხალხის მიმართ", - განაცხადა მოძრაობა "შეცვალეს" წევრმა.
აქციის მონაწილეებს თან აქვთ პლაკატები წარწერებით: "ჯარიც გვყავს და იარაღიც გვაქვს, მთავარსარდალი არ გვყავს", "დაიცავი საქართველოს კონსტიტუცია და არა გადამგდები ოლიგარქის ინტერესები".