თურქეთის პრეზიდენტის, რეჯეფ ტაიფ ერდოღანის თქმით, თურქეთის პარლამენტმა შესაძლოა, მიიღოს რეზოლუცია ინდიელების გენოციდის შესახებ. ეს განცხადება რეჯეფ ტაიფ ერდოღანმა ამერიკის სენატის მიერ სომეხთა გენოციდის შესახებ მიღებული რეზოლუციის კომენტირებისას გააკეთა.
„ჩვენ გავხსენით მილიონზე მეტი დოკუმენტი 1915 წლის მოვლენების შესახებ. მოდით და შეისწავლეთ. ჩვენ ვსაუბრობთ საბუთებით. ჩვენც მსგავსი საპასუხო ნაბიჯები უნდა გადავდგათ და ასეც მოვიქცევით. როცა ამერიკაზე ვსაუბრობთ, ნუთუ შესაძლებელია ინდიელებზე ხმა არ ამოვიღოთ? ეს აშშ-ის ისტორიის სამარცხვინო ფურცელია“,-განაცხადა ერდოღანმა ადგილობრივ ტელევიზიასთან ინტერვიუში.
შეგახსენებთ, გასულ კვირას, აშშ-ის სენატმა სომეხთა გენოციდის აღიარების შესახებ რეზოლუცია მიიღო. რეზოლუციაში წერია, რომ ოსმალეთის იმპერიის მიერ 1915-1923 წლებში 1,5 მილიონი სომეხის მკვლელობა გენოციდია.