ბუტაფორია და მოსიარულე სკანდალი, - ასე აფასებს „ნაციონალური მოძრაობის" წევრი თინა ბოკუჩავა პრეზიდენტ სალომე ზურაბიშვილის ერთწლიან საქმიანობას.

ამასთან, თინა ბოკუჩავამ დიასპორებთან დაკავშირებით სალომე ზურაბიშვილის ინიციატივაც შეაფასა, კერძოდ, საუბარია ინიციატივაზე, რომლის თანახმად, პარლამენტში დიასპორა უნდა იყოს წარმოდგენილი.

„კი ბატონო, ზოგადად წარმომადგენლობით სიებს მივესალმები, მათ შორის იმას, რომ წარმომადგენლობითი იყოს გენდერული ნიშნით, თუმცა, დღეს საარჩევნო საკითხთან დაკავშირებით ყველაზე ფუნდამენტური არის ის, რომ ადამიანებს რეალურად ჰქონდეთ არჩევანის საშუალება, ეს იქნება ან პროპორციული სრულად, რასაც ივანიშვილი დაპირდა საზოგადოებას და მოატყუა, ან ე.წ. გერმანული მოდელი, რაც ფაქტობრივად იგივე შედეგს იძლევა, რასაც გვაძლევდა პროპორციული. ეს არის ყველაზე ფუნდამენტური საკითხი და ამაზე უნდა პოზიციონირებდეს პრეზიდენტი, მაგრამ პრეზიდენტი არ გვყავს, გვყავს ბუტაფორია.

ყოველდღიურად პრეზიდენტად წოდებული სალომე ზურაბიშვილი, რომელსაც სკამი უყიდა ივანიშვილმა და ამიტომ ის სრული ბუტაფორიაა, ნაცვლად იმისა, რომ იყოს ქვეყნის უმაღლესი მთავარსარდალი, არის მოსიარულე სკანდალი, რომელიც ყოველდღიურად ამტკიცებს იმას, რომ როცა ხელისუფლება შეიცვლება და ეს ძალიან მალე მოხდება, დადგება მისი იმპიჩმენტის საკითხი,"- განაცხადა თინა ბოკუჩავამ.