საქართველოში პოლიტიკურ მღელვარებაა. გვსურს, რომ ამ პროცესიდან საქართველო გამოვიდეს თავისუფალი, სამართლიანი და ყველასთვის მისაღები საარჩევნო სისტემით,-ამის შესახებ ამერიკელმა კონგრესმენმა დევიდ პრაისმა ვაშინგტონში, ქართული დელეგაციის წევრებთან-ირაკლი კობახიძესთან, კახა კუჭავასთან და ირაკლი ბერაიასთან შეხვედრის შემდეგ განაცხადა.
როგორც დევიდ პრაისი „ამერიკის ხმის“ ქართულ რედაქციასთან აცხადებს, აღნიშნულს დიდი ძალისხმება სჭირდება, თუმცა იმედოვნებს, რომ შედეგი პოზიტიური იქნება.
„ჩვენ ვიცით რომ საქართველოში პოლიტიკური მღელვარებაა. გვსურს, რომ ამ პროცესიდან საქართველო გამოვიდეს თავისუფალი, სამართლიანი და ყველასთვის მისაღები საარჩევნო სისტემით. გვესმის, რომ ამას ძალისხმევა ჭირდება. იმედი გვაქვს, შედეგი პოზიტიური იქნება... მიუხედავად იმისა, თუ რომელი პარტია მართავს ქვეყანას, ჩვენ საქართველოს მთავრობასთან ვმუშაობთ. ასევე ვმუშაობთ ოპოზიციასთან. ჩვენ კარგი ურთიერთობა გვაქვს ყველასთან და გვინდა ეს შევინარჩუნოთ. ჩვენთვის ღირებულია არასამთავრობო ორგანიზაციების, NDI-ის და IRI-ის საქმიანობა საქართველოში", - აცხადებს დემოკრატი კონგრესმენი დევიდ პრაისი.
ცნობისთვის, ქართული დელეგაცია ვაშინგტონში ვიზიტით იმყოფება. ისინი კონგრესის, ადმინისტრაციის და აკადემიური წრეების წარმომადგენლებს ხვდებიან. დელეგაციას შეხვედრებზე უმრავლესობის წევრი ირაკლი კობახიძე, პარლამენტის თავმჯდომარის მოადგილე, კახა კუჭავა და საგარეო ურთიერთობათა კომიტეტის თავმჯდომარე, ირაკლი ბერაია წარმოადგენენ.