ჩვენ ხელისუფლებას შევთავაზეთ არაერთი წინადადება, მაგრამ ისინი ამ წინადადებაზე უარს ამბობენ, - ამის შესახებ „შენების მოძრაობის“ ლიდერმა დავით უსუფაშვილმა ჟურნალისტებს ხელისუფლებასა და ოპოზიციას შორის მორიგი შეხვედრის დაწყებამდე განუცხადა.

მისივე თქმით, საქართველოს სჭირდება დამშვიდება.

„ვხედავთ, რა ხდება საზოგადოებაში. პოლიტიკურ პროცესებში გამეფებულმა მტრობამ ქვეყანა მიიყვანა კატასტროფის ზღვარზე. ამიტომ, ჩვენ გვჭირდება სამართლიანი არჩევნების განცდა, მოსახლეობას სჭირდება განცდა, რომ არჩევნების გზით ცვლილება შესაძლებელია და ამ ცვლილების შემდეგ ქვეყანა დაწყნარდება. სწორედ ამ კრიტერიუმებს აკმაყოფილებს პროპორციული სისტემა. მე არ მგონია, რომ პროცესი ამ შეხვედრით დამთავრდება, მაგრამ ყველაფერი დამოკიდებულია იმაზე, რამდენად ადეკვატური იქნება ხელისფულება იმის გააზრებაში, თუ რა ხდება ქვეყანაში“, - განაცხადა უსუფაშვილმა.