საქართველოს მთავრობის ადმინისტრაციასთან მოძრაობა "გაბედეს" ორგანიზებით აქცია მიმდინარეობს. მოძრაობის წევრებმა 15 წლის ლუკა სირაძის ოჯახს კიდევ ერთხელ მიუსამძიმრეს და მათ შინაგან საქმეთა მინისტრის ვახტანგ გომელაურის თანამდებობიდან დაუყოვნებლივ გადადგომა მოითხოვეს.
აქციის მონაწილეებისა და მოძრაობის წევრების შეფასებით, ლუკა სირაძე „სისტემის მსხვერპლია“.
„დღეს ჩვენ შევიკრიბეთ იმ რეჟიმის წინააღმდეგ, რომელმაც უამრავი ახალგაზრდა შეიწირა. სისტემა არის პრობლემური, არ გამოსწორებულა არაფერი. ძალოვანი უწყებები კარგად არ ასრულებენ თავიანთ უფლება-მოვალეობებს. სუს-ი, შინაგან საქმეთა სამინისტრო და სხვა ძალოვანი სტრუქტურები, ფაქტობრივად, ერთი ადამიანის მსახურადაა გადაქცეული, ემსახურება ერთი ადამიანის ინტერესებს და არა ქვეყნის ინტერესებს. ამის ნათელი მაგალითია ისიც, რომ ვაჟა გაფრინდაშვილი წელიწადი და 9 თვით ჩასვეს ოკუპანტებმა. სწორედ ეს არის პრობლემა და ამ ყველაფერს ვაპროტესტებთ ახალგაზრდები",-განაცხადა მოძრაობა „გაბედეს“ ერთ-ერთმა ლიდერმა ბექა ნათელაშვილმა.