ოჯახის მთავარი მოთხოვნა, დააკავონ პირები, რომლებიც ლუკას დაკითხვის პროცესში უშუალოდ მონაწილეობდნენ, - ამის შესახებ გარდაცვლილი მოზარდის, ლუკა სირაძის ძმამ, ბექა სირაძემ დღეს გამართულ პრესკონფერენციაზე განაცხადა.
მისივე განმარტებით, ოჯახი გამოძიებას ენდობა, რადგან „პროგრესი აშკარად ჩანს და დაკავებულია ერთ-ერთი პოლიციელი“.
„ამ ეტაპზე ოჯახის მთავარი მოთხოვნა არის ის, რომ დააკავონ პირები, რომლებიც უშუალოდ მონაწილეობდნენ ამ პროცესში, ემუქრებოდნენ, გვერდზე გაიყვანეს თუ რაც იყო ანუ ის პირები, რომლებსაც უშუალოდ შეხება ჰქონდათ ლუკასთან...
ჩემი ოჯახის ინტერესი კონკრეტულად არის ის, რომ დაისაჯონ პოლიციელები, რომლებსაც უშუალო შეხება ჰქონდათ დაკითხვის პროცესთან, დანარჩენი, როგორც კანონი ითხოვს, იმის მიხედვით მოხდება“, - განაცხადა ლუკა სირაძის ძმამ.