თუკი ხელისუფლება ხალხის სახელით გველაპარაკება, მაშინ ყველამ გადავიხადოთ გადასახადები, გადაიხადოს „მაესტრომაც“ და „იმედმაც“, - ამის შესახებ ტელეკომპანია „პირველის“ დირექტორმა ინგა გრიგოლიამ ჟურნალისტებს ფინანსთა მინისტრთან შეხვედრამდე განუცხადა.
მისივე თქმით, დღევანდელ შეხვედრაზე ის ფინანსთა სამინისტროს არ მიუწვევია და შეხვედრის შესახებ ნინო ჯანგირაშვილისგან შეიტყო.
„არანაირი მოლოდინი არ მაქვს ამ შეხვედრიდან. უფრო მეტსაც გეტყვით, ჩემთვის არავის დაურეკავს ფინანსთა სამინისტროდან და არც არავის მოვუწვევივარ. დამირეკა ნინო ჯანგირაშვილმა. გამოდის, ნინოს მოწვევით ვარ ახლა აქ, კაციშვილს არ გახსენებია, რომ ჩემთან უნდა დაერეკა, რაც იმას ნიშნავს, რომ არანაირი მოლოდინი არ მაქვს. მაქვს ერთადერთი სათქმელი მინისტრისთვის: გუშინ რომ დაეწყო მთელი ხელისუფლება, გამოვიდა და გააჟღერა მესიჯი, რომ ხალხს ეკუთვნის ბიუჯეტი და ხალხს უნდა დაუბრუნონ გადასახადები, დიახ, ხალხს უნდა დაუბრუნოთ გადასახადები - გადაახდევინეთ „იმედს“ და „მაესტროს“ ის ბევრი მილიონი, რომელიც ეკუთვნის ხალხს და შემდეგ გველაპარაკეთ ულტიმატუმის ენით“, - განაცხადა ინგა გრიგოლიამ.
მისივე თქმი, ტელეკომპანია “პირველი“ „გაჯიქებას“ არ აპირებს და აუცილებლად გადაიხდის დავალიანებას, თუმცა მას შემდეგ, რაც თანაბარ პირობებში იქნება სხვა დავალიანებების მქონე ტელევიზიებთან.
„მოდით, ვიყოთ ძალიან გულწრფელები და პატიოსნები: მე არავის დახურვა არ მინდა. მე ვამბობ იმას, რომ უსინდისობაა, დააბრალო კერძო კომპანიებს „კავკასიას“ და ჩვენ თავს ვგულისხმობ, რომ გადასახადებს არ იხდის ბიუჯეტში, მაშინ როდესაც 2016 წლიდან მოყოლებული უზარმაზარ დავალიანებას არ ახდევინებ ტელევიზიებს, რომელიც კოჭს გიგორებს. ინკასოზე მეტად ამ თემაზე ვარ გაბრაზებული. ჩვენ ვართ კეთილსინდისიერი გადამხდელები, მხოლოდ 2 კვირით ვითხოვდით გადაწევას. გაჯიქებას არ ვაპირებთ“, - განაცხადა ინგა გრიგოლიამ.