ერაყში, ამერიკულ ბაზაზე სარაკეტო დარტყმის შედეგად, ერთი ამერიკელი სამხედრო დაიღუპა. თავდასხმა ქვეყნის ჩრდილოეთით მდებარე K1-ის სამხედრო ბაზაზე განხორციელდა. აშშ-ს სახელმწიფო დეპარტამენტის ინფორმაციით, დაჭრილია კიდევ რამდენიმე ამერიკელი და ერაყელი სამხედრო .
მედიის ინფორმაციით, მხოლოდ გუშინ, აღნიშნული ბაზის მიმართულებით 30 რაკეტა გაუშვეს.
როგორც ცნობილია, K1-ზე განთავსებულია ამერიკისა და ერაყის გაერთიანებული ძალები, რომლებიც „ისლამური სახელმწიფოს“ ჯიჰადისტურ ჯგუფებს ებრძვიან რეგიონში. მომხდარზე პასუხისმგებლობა ჯერ არავის აუღია. შეგახსენებთ, ბოლო დროს ერაყის ამერიკულ ბაზებზე არაერთხელ განხორციელდა სარაკეტო თავდასხმები. ვაშინგტონი აღნიშნულში ირანსა და მის მიერ მხარდაჭერილ ძალებს ადანაშაულებს. ცოტა ხნის წინ, აშშ-ის სახელმწიფო მდივანმა, მაიკ პომპეომ განაცხადა, რომ თუ ამერიკელებს და მის მოკავშირეებს კიდევ მიადგებოდათ ზიანი, „აშშ გადამწყვეტ საპასუხო ზომებს მიიღებდა“.