„ნაციონალური მოძრაობა“ - ვაჟა გაფრინდაშვილის პირადი თავდადება ცხადყოფს, რომ სიმართლის წინაშე მტერი უძლურია-მავთულხლართები აუცილებლად დაირღვევა
პარტია „ერთიანი ნაციონალური მოძრაობა“ ექიმი ვაჟა გაფრინდაშვილის უკანონო პატიმრობიდან გათავისუფლებას ეხმაურება.
„გმირი ექიმი ვაჟა გაფრინდაშვილი რუსი ოკუპანტების რამდენიმე თვიანი პატიმრობიდან გათავისუფლდა. მისი პირადი თავდადება ცხადყოფს, რომ სიმართლის წინაშე მტერი უძლურია, მავთულხლართები აუცილებლად დაირღვევა და ოკუპაცია დასრულდება.
ვაჟა გაფრინდაშვილმა მთელ მსოფლიოს გაუტეხელობისა და გამბედაობის მაგალითი აჩვენა, როდესაც თავისუფლების, ოჯახთან და მეგობრებთან დაბრუნების დაპირების მიუხედავად, ოკუპანტ ძალასთან გარიგებასა და ოკუპაციის აღიარებაზე უარი თქვა.
ვაჟა ექიმი საქართველოს გამარჯვების და ერთიანობის სიმბოლოა, ხოლო მისი გათავისუფლება პირადად მისი, მისი ოჯახის, კოლეგების, საქართველოს მოქალაქეების, მთელი საქართველოს ბრძოლისა და ჩვენი პარტნიორი სახელმწიფოების ზეწოლის შედეგია.
მადლობა თითოეულ ადამიანს, ვინც ფიქრობდა და იღვწოდა მისი თავისუფლებისთვის, რადგან ეს ამავდროულად იყო ქართული სახელმწიფოსთვის და ჩვენი ქვეყნის ერთიანობისთვის ბრძოლა. ძალა ერთობაშია! ოკუპაცია დასრულდება და საქართველო აუცილებლად გაიმარჯვებს”, - აღნიშნულია პარტიის მიერ გავრცელებულ ინფორმაციაში.
