2018 წელს აფხაზეთის ავტონომიური რესპუბლიკის დევნილთა საქმეებისა და სოფლის მეურნეობის დეპარტამენტების მიერ გატარებული ღონისძიებები არ აღმოჩნდა საკმარისი და/ან ქმედითუნარიანი მათი დებულებებით განსაზღვრული მიზნების და ამოცანების მისაღწევად, ამავდროულად, აქტივობები ზოგიერთი მიმართულებით, საერთოდ არ ფიქსირდება. ამის შესახებ სახელმწიფო აუდიტის ანგარიშშია აღნიშნული.

სახელმწიფო აუდიტის სამსახურმა ჩაატარა აფხაზეთის ავტონომიური რესპუბლიკის დევნილთა საქმეების დეპარტამენტის, იუსტიციის დეპარტამენტის და სოფლის მეურნეობის, გარემოს დაცვისა და ბუნებრივი რესურსების დეპარტამენტების საბიუჯეტო სახსრების ხარჯვისა და მატერიალური ფასეულობების გამოყენების მოქმედ კანონმდებლობასთან შესაბამისობის აუდიტი. როგორც აუდიტის ანგარიშიდან ირკვევა, აფხაზეთის ავტონომიური რესპუბლიკის დევნილთა საქმეების დეპარტამენტის აქტივობა დევნილი მოსახლეობის ყოფის გაუმჯობესების ხელშეწყობისა და პრობლემების გადაჭრის მიზნით არასაკმარისი იყო.

ამასთან, არ დასტურდება აქტივობა არსებული საერთაშორისო, სამთავრობო, საზოგადოებრივი, აკადემიური გამოცდილების, აპრობირებული პროგრამების, ინიციატივების, კვლევების, მოსაზრებების შეგროვების, გაანალიზებისა და შეჯერების საქმიანობაში.

„არ ფიქსირდება გაწეული პრაქტიკული დახმარებები აფხაზეთიდან იძულებით გადაადგილებულ პირთა სასოფლო-სამეურნეო კოოპერატიულ საქმიანობაში ჩასართავად; არასაკმარისი და არაეფექტიანი იყო აქტივობები დევნილი მოსახლეობის სოციალურ-ეკონომიკური მდგომარეობის გასაუმჯობესებლად და დასაქმების ხელშეწყობის პრობლემის მოსაგვარებლად. არ ფიქსირდება ხელშემწყობი ღონისძიებები დევნილთა პროფესიული განათლებისა და გადამზადების სახელმწიფო პროგრამებში ჩასართავად“, - აღნიშნულია აუდიტის ანგარიშში.