ადვოკატთა ასოციაციის აღმასრულებელი საბჭო - ბოლო პერიოდში, სხვადასხვა დაინტერესებულ მხარეთა მხრიდან გახშირდა მცდელობა, ადვოკატი დაავალდებულონ, გაამჟღავნოს ის ინფორმაცია, რომელიც მისთვის ცნობილი პროფესიული საქმიანობის ფარგლებში გახდა

გვსურს, შეშფოთება გამოვხატოთ, რომ ბოლო პერიოდში, სხვადასხვა დაინტერესებულ მხარეთა მხრიდან გახშირდა მცდელობა, ამა თუ იმ ფორმით, ადვოკატი დაავალდებულონ, გაამჟღავნოს ის ინფორმაცია და ისაუბროს იმ საკითხებზე, რომელიც ადვოკატისთვის ცნობილი გახდა მისი პროფესიული საქმიანობის ფარგლებში,-ამის შესახებ ადვოკატთა ასოციაციის აღმასრულებელი საბჭოს მიერ გავრცელებულ განცხადებაშია ნათქვამი.

ადვოკატთა ასოციაციის აღმასრულებელი საბჭოს ცნობით, კლიენტის ინტერესების დაცვისას საადვოკატო საქმიანობის ქვაკუთხედს კლიენტისა და ადვოკატის ნდობა და მათი კომუნიკაციის კონფიდენციალობა წარმოადგენს.

„პროფესიული საიდუმლოების დაცვა ადვოკატის ერთ-ერთი ფუნდამენტური უფლება და ვალდებულებაა, რაც გარანტირებულია როგორც საქართველოს კანონმდებლობით, ასევე მრავალი საერთაშორისო სამართლებრივი აქტით.

უნდა გვახსოვდეს, რომ ადვოკატი საჯარო ფუნქციის მატარებელი სუბიექტია, რომელსაც განსაკუთრებული როლი გააჩნია მართლმსაჯულების განხორციელების პროცესში. ადვოკატი ემსახურება ისეთ უმნიშვნელოვანეს მიზანს, როგორიცაა მოქალაქეებისა თუ იურიდიული პირების უფლებებისა და ინტერესების ეფექტიანი დაცვა. სწორედ ამიტომ, ადვოკატი სარგებლობს სამართლებრივი დაცვის მაღალი სტანდარტებით. ამასთან, ადვოკატსა და კლიენტს შორის წარმოებული ნებისმიერი საუბრის მიყურადება, ჩაწერა უკანონო და დაუშვებელია და წარმოადგენს ადვოკატის საქმიანობაში ჩარევის უხეშ ფორმას, რაც დასჯადია სისხლის სამართლის წესით, როგორც ადგილობრივ, ისე საერთაშორისო დონეზე,“- ნათქვამია ადვოკატთა ასოციაციის აღმასრულებელი საბჭოს განცხადებაში.

პირებს, რომლებიც ადვოკატებს პროფესიული საქმიანობის ფარგლებში მიღებული ინფორმაციის გამჟღავნებას ავალდებულებენ, ადვოკატთა ასოციაციის აღმასრულებელი საბჭო მოუწოდებს, მხედველობაში მიიღონ ის გარემოება, რომ ადვოკატის მიერ პროფესიული საქმიანობის ფარგლებში მოპოვებული ნებისმიერი ინფორმაცია კონფიდენციალურია და გაუმჟღავნებლობის აბსოლუტურ პრივილეგიას, გასული დროის მიუხედავად ექვემდებარება.

„აღნიშნული პრინციპი ვრცელდება როგორც უშუალოდ საადვოკატო საქმიანობის განხორციელებისას მიღებულ ინფორმაციაზე, ასევე ადვოკატს/საადვოკატო ბიუროს პარტნიორსა და კლიენტს შორის ნებისმიერი სახის პროფესიულ კომუნიკაციაზე.

სამწუხაროდ, საჯარო განცხადებების გაკეთებისას, არ ხდება იმის სწორად გააზრება, რომ პროფესიული საიდუმლოების დაცვის პრინციპის უგულებელყოფამ და ამით გამოწვეული ნდობის ფაქტორის დაზიანებამ, თუ რაოდენ დიდი ზიანი შეიძლება მიაყენოს ქვეყანაში ფიზიკური თუ იურიდიული პირების უფლებრივ მდგომარეობას, მართლმსაჯულების განხორციელებასა და კანონის უზენაესობას.

ამიტომ, გვსურს, ყველას მოვუწოდოთ, რომ ადვოკატის საქმიანობასთან დაკავშირებით განცხადებების გაკეთებისას, თუ გარკვეული ქმედების განხორციელებისას, სწორად შეაფასონ პროფესიის არსი და ფუნდამენტური პრინციპები, რათა ზიანი არ მიადგეს უფლებების დაცვასა და მართლმსაჯულების განხორციელებას ჩვენს ქვეყანაში,“- ნათქვამია ადვოკატთა ასოციაციის აღმასრულებელი საბჭოს განცხადებაში.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს