ჩრდილოეთ კორეის ლიდერი, „დიპლომატიურ და სამხედრო კონტრშეტევებზე“ საუბრობს, რათა მოხდეს ქვეყნის სუვერენიტეტისა და უსაფრთხოების შენარჩუნება. ამის შესახებ კიმ ჩენ ინმა 7 - საათიანი სიტყვით გამოსვლის დროს ისაუბრა.
ჩრდილოეთ კორეის ლიდერმა მუშათა პარტიის შეკრებაზე „რთულ და გაჭიანურებულ ბრძოლაზეც“ გაამახვილა ყურადღება. მედიის ცნობით, ის სავარაუდოდ, აშშ-ის წინააღმდეგ დაგეგმილ ნაბიჯებს გულისხმობდა. ადგილობრივი მედიის ცნობით, მან ძლიერი სოციალისტური ერის მშენებლობის აუცილებლობაზეც ისაუბრა. მათივე თქმით, პარტია მუშაობს „მნიშვნელოვან დოკუმენტზე“ და „ახალ გზაზე“.
სხვა დეტალები კორეის სახელმწიფო სააგენტოს არ გაუვრცელებია. დამატებითი ინფორმაცია სავარაუდოდ ხვალ გახდება ცნობილი, როცა კიმ ჩენ ინი საახალწლო მიმართვას გააკეთებს.
შეგახსენებთ, აშშ-ის ძალები სამხრეთ კორეასა და იაპონიაში საგანგებო რეჟიმში არიან. რამდენიმე თვის წინ, ფხენიანი ვაშინგტონს „საშობაო საჩუქრით“ დაემუქრა. ამერიკის პრეზიდენტის, დონალდ ტრამპის თქმით კი, აშშ მზადაა ნებისმიერ „საჩუქარს“ გაუმკლავდეს.