“აქ ბავშვებს თვალები დათხარეს” - ამ წარწერით მოძრაობა “შეცვალეს” წევრებმა პარლამენტის შენობის წინ მდუმარე აქცია-პერფომანსი გამართეს.

პერფორმანსით “შეცვალეს” წევრებმა პარლამენტის შენობის წინ კარვების აღება და მის ნაცვლად საბავშვო ატრაქციონების განთავსება გააპროტესტეს.

როგორც მოძრაობა “ შეცვალეს” ერთ-ერთმა წევრმა, ნიკა ნოზაძემ აქცია-პერფომანსის დაწყებამდე ჟურნალისტებს განუცხადა, ისინი დაშლას არ აპირებენ და საზოგადოებას მოუწოდებენ, არ მიიყვანონ ბავშვები პარლამენტის წინ განთავსებულ ატრაქციონებზე.

შეგახსენებთ, სამოქალაქო აქტივისტები და ოპოზიციის წარმომადგენლები მთელი ღამის განმავლობაში პარლამენტის შენობასთან იმყოფებოდნენ. ისინი შენობის წინ კარვების ნაცვლად ატრაქციონებისა და ბატუტის დადგმას აპროტესტებდნენ.