ქეთევან ციხელაშვილი - ქართველებს, ოსებს, აფხაზებს და ნებისმიერი ეროვნების მოქალაქეს გვაერთიანებს ის, რომ მშვიდობა გვინდა, 2020 წელი წარმატებული ყოფილიყოს

შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი წეროვანის დევნილთა დასახლებაში, ახალგორის რაიონიდან დევნილ ბაშარულების მრავალშვილიან ოჯახს ესტუმრა, სიმბოლური საახალწლო საჩუქრები გადასცა და დამდეგი ახალი წელი მიულოცა. ამის შესახებ „ინტერპრესნიუსს“ სახელმწიფო მინისტრის აპარატიდან აცნობეს.

“ბაშარულების ოთხშვილიანი ოჯახის მსგავსად, სახელმწიფო მინისტრის აპარატისგან საჩუქრები, ახალგორის რაიონიდან დევნილმა, კიდევ 21-მა მრავალშვილიანმა ოჯახმა მიიღო.

ქეთევან ციხელაშვილმა, წეროვანის დევნილთა დასახლებიდან ახალი წელი მიულოცა ახალგორელებს, რომლებიც მეოთხე თვეა ე.წ. გამშვები პუნქტის ჩაკეტვის გამო სრულ იზოლაციაში იმყოფებიან და ოჯახის წევრებთან შეხვედრას ახალ წელსაც კი ვერ ახერხებენ.

„დღეს წეროვანში ბაშარულების მრავალშვილიან ოჯახს ვესტუმრეთ, სადაც ოთხი არაჩვეულებრივი პატარა იზრდება. ახალგორიდან დევნილ ყველა მრავალშვილიან ოჯახს მივულოცეთ ახალი წელი და მათთან ერთად, რა თქმა უნდა, ყველა ოჯახს, ყველა პატარას ვულოცავ. განსაკუთრებით კი იმ ადამიანებს, რომლებიც ჩვენი ქვეყნის მთავარი გამოწვევის - მიმდინარე ოკუპაციისა და გადაუჭრელი კონფლიქტის სიმძიმეს ყოველდღურად გრძნობენ. მე დღეს წეროვანიდან გილოცავთ. იმ დასახლებიდან, სადაც დევნილობაში მყოფი ჩვენი მოსახლეობაა. ძირითადად ახალგორიდან დევნილი.

დღეს ოჯახების ნაწილი გაყოფილია. ახალგორის მიმართულებით მიმოსვლა შეზღუდულია. მე მინდა იმ ადამიანებს, რომლებიც მავთულხლართებს მიღმა, ახალგორში ცხოვრობენ, მივულოცო ახალი წელი. გამძლეობისათვის, სიმტკიცისათვის მადლობა ვუთხრა და გამოვთქვა იმედი, ასევე მივცე პირობა, რომ მუშაობას, მათი ძალიან მძიმე პირობების შესამსუბუქებლად, აუცილებლად გავაგრძელებთ. იმისთვის, რომ ჰქონდეთ გადაადგილების, საკუთარ ოჯახებთან შეერთებისა და მათი საჭიროებებისა და ინტერესების განხორციელების შესაძლებლობა.

ასევე მივულოცავ ყველას გალის რაიონში, კოდორში, მთლიანად აფხაზეთსა და ცხინვალის რეგიონში ყველას, განურჩევლად ეთნიკური წარმომავლობისა, რადგანაც დარწმუნებული ვარ, რომ ჩვენ ყველას, ქართველებს, ოსებს, აფხაზებს და საქართველოს სხვა ნებისმიერი ეროვნების მოქალაქეს გვაერთიანებს მინიმუმ ის, რომ გვინდა მშვიდობა შვილებისათვის, განვითარებული მომავალი და კეთლდღეობა. ამისათვის მუშაობს დღეს საქართველოს ხელისუფლება, ესაა საზოგადოების მთავარი დაკვეთა და გისურვებთ, რომ 2020 წელი განსაკუთრებით წარმატებული ყოფილიყოს“ , - განაცხადა ქეთევან ციხელაშვილმა.

აღნიშნულ ინფორმაციას სახელმწიფო მინისტრის აპარატი ავრცელებს.

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 01.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია
ბაკურიანში საერთაშორისო სათხილამურო ფედერაციის ეგიდით მსოფლიო თასის ეტაპი სკი კროსში დასრულდა