„ლეიბორისტული პარტიის“ ოფისში „პოლიტიკური დევნის ფაქტების შემსწავლელი მრავალპარტიული კომისიის“ სხდომა მიმდინარეობს, სადაც ოპოზიციის წარმომადგენლები ე.წ. შავ სიაზე იმსჯელებენ.

„ლეიბორისტული პარტიის” წევრის, ლაშა ჩხარტიშვილის ინფორმაციით, ოპოზიციური პარტიების მიერ შედგენილ ე.წ. შავ სიაში მერიის ის თანამშრომლებიც შევლენ, „რომლებიც ძალადობდნენ მომიტინგეებზე, აქციის მონაწილე პოლიტიკოსებსა და ჟურნალისტებზე”.

ჩხარტიშვილის განცხადებით, დღეს შესაძლოა, სიაში არსებული გვარების ნაწილი გამოქვეყნდეს.

„პოლიტიკური დევნის ფაქტების შემსწავლელი მრავალპარტიული კომისიის მეორე შეკრების დატვირთვა არის ერთი მხრივ საბოლოოდ ფორმაზე შეთანხმება, რომლითაც გადაეგზავნება დასავლელ პარტნიორებს და საერთაშორისო ორგანიზაციებს, მეორე მხრივ გვარების მცირე ნაწილი დღეს იქნება გამოქვეყნებული. რაც შეეხება სიახლეს, მერიის თანამშრომლებმა გამოიჩინეს თავი საახალწლოდ. კალაძის სპეცრაზმი შეიძლება დავარქვათ იმას, რაც ვიხილეთ ჯერ საკრებულოში, შემდეგ ქალაქის ქუჩებში, რომლებიც ძალადობდნენ მომიტინგეებზე, აქციის მონაწილე პოლიტიკოსებსა და ჟურნალისტებზე და მათი შეყვანაც მოხდება ამ სიებში“, - განაცხადა ჩხარტიშვილმა.