ლევან ალაფიშვილი - ბაკურიანში, ე.წ. 25-იანების საბაგიროზე საბჭოთა კავშირის სიმბოლიკიანი რუბლის გამოყენება კანონდარღვევაა და ფაქტზე სახელმწიფო უსაფრთხოების სამსახურმა მოკვლევა უნდა დაიწყოს

ბაკურიანში, ე.წ. 25-იანების საბაგიროზე საბჭოთა კავშირის სიმბოლიკიანი რუბლის გამოყენების ფაქტზე სახელმწიფო უსაფრთხოების სამსახურში მოკვლევა უნდა დაიწყოს, - ამის შესახებ „ინტერპრესნიუსს“ იურისტმა ლევან ალაფიშვილმა განუცხადა.

როგორც ალაფიშვილმა აღნიშნა, თავისუფლების ქარტიით გათვალისწინებულია ტოტალიტარული სიმბოლიკის აკრძალვა, რომლის გამოყენებაც ჟეტონად ან სხვა ფორმით, კანონდარღვევაა.

„შესაბამისად, ეს არის სუს-ის შესწავლა-რეაგირების საგანი. ფაქტი სუს-ის კომისიამ უნდა დაადგინოს და თუკი რეალობა დადასტურდა, უნდა გაატაროს კანონით გათვალისწინებული ღონისძიებები სსრკ, ტოტალიტარული სიმბოლიკის გამოყენების აღმოსაფხვრელად. თავისუფლების ქარტიის მე-7 მუხლის მე-6 პუნქტი სუს-ის კომისიას ასეთი ფაქტების დადგენის ვალდებულებას აკისრებს და მათ აღმოსაფხვრელად შესაბამისი ღონისძიებების გატარების უფლებამოსილებასაც ანიჭებს“, - განაცხადა ალაფიშვილმა.

ცნობისთვის, ბაკურიანში მყოფი დამსვენებლების ნაწილის ინფორმაციით, ე.წ. 25-იანებზე, საბაგიროს საფასურის გადახდისას, მგზავრს ჟეტონის ან ბილეთის ნაცვლად საბჭოთა კავშირის დროინდელ ხურდა ფულს - რუბლს აძლევენ. დამსვენებლები სოციალურ ქსელში შესაბამის ფოტოებსაც ავრცელებენ. მთის კურორტების განვითარების კომპანიის განცხადებით, ბაკურიანში, ე.წ. 25-იანების საბაგირო, სადაც საბჭოთა კავშირის დროინდელი რუბლის გამოყენება ხდება, მათი მენეჯმენტის ქვეშ არ არის.

ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
ქართული პრესის მიმოხილვა 05.03.2021
სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
სილქნეტი განცხადებას ავრცელებს (R)