თბილისში, „დამპალოს სასაფლაოზე“ დაპირისპირების შედეგად, გარდაცვლილი 24 წლის მურად წურწუმიას საქმეში სახალხო დამცველი ჩაერთო. აღნიშნულის შესახებ სახალხო დამცველმა ნინო ლომჯარიამ ჟურნალისტებს განუცხადა.
„რა თქმა უნდა, ჩავერთეთ, გაგზავნილია წერილები და მოთხოვნა ინფორმაციის მისაღებად. ჩვენ გვჭირდება გარკვეული ინფორმაცია მივიღოთ კვალიფიკაციასთან და სხვა საკითხებთან დაკავშირებით. მას შემდეგ, რაც მივიღებთ ამ ინფორმაციას, გვექნება შესაბამისი რეაგირება“, - განაცხადა ლომჯარიამ.
ცნობისთვის, 2 იანვარს, „დამპალოს სასაფლაოზე“ დაპირისპირების შედეგად 24 წლის მურად წურწუმია გარდაიცვალა. აღნიშნულთან დაკავშირებით დაკავებულია შინაგან საქმეთა სამინისტროს თანამშრომელი, რომელსაც სასამართლოს გადაწყვეტილებით, აღკვეთის ღონისძიების სახით პატიმრობა შეეფარდა.
გარდაცვლილი ახალგაზრდის ოჯახის წევრები ინციდენტში მონაწილე კიდევ ერთი პირის დასჯას ითხოვენ.