ვახტანგ ძაბირაძე - ხელისუფლების გულწრფელობაში ეჭვი მეპარება, როდესაც აცხადებს, რომ ანაკლიის ღრმაწყლოვანი პორტი აუცილებლად აშენდება

„ანაკლიის კონსორციუმთან“ ხელშეკრულების გაწყვეტის თაობაზე გადაწყვეტილება მოულოდნელი არ ყოფილა. ბოლო პერიოდში ამ პროცესს პოლიტიკური სახე მიეცა, - ამის შესახებ „ინტერპრესნიუსს“ პოლიტოლოგმა ვახტანგ ძაბირაძებ განუცხადა, რითაც გამოეხმაურა ხელისუფლების გადაწყვეტილებას „ანაკლიის კონსორციუმთან“ ხელშეკრულების გაწყვეტის თაობაზე.

ძაბირაძის თქმით, მას ხელისუფლების გულწრფელობაში ეჭვი ეპარება, როდესაც აცხადებს, რომ ანაკლიის ღრმაწყლოვანი პორტი აუცილებლად აშენდება.

„დეტალებზე საუბარი გამიჭირდება, რადგან არ ვიცი ხელშეკრულებით რა იყო გათვალისწინებული, თუმცა ეს გადაწყვეტილება მოულოდნელი არ ყოფილა. ბოლო პერიოდში ამ პროცესს პოლიტიკური სახე მიეცა. ამიტომ, აქედან პოლიტიკის გამორიცხვა არ შემიძლია. პოლიტიკაზე როცა ვსაუბრობთ, პირველ რიგში, მამუკა ხაზარაძესთან შექმნილი პრობლემა იგულისხმება. თუ აქამდე შესაძლებელი იყო მოლაპარაკებები, შეიძლებოდა, რომ ეს პროცესი კიდევ 1 წელი გახანგრძლივებულიყო, თუნდაც იმიტომ, რომ საზოგადოებაში ხელისუფლების მიმართ ეჭვები არ გაჩენილიყო.

რაც შეეხება მთავრობის დაპირებას, რომ პროექტი აუცილებლად განხორციელდება, მათ სხვა გზა ამ წუთში არ აქვთ. ნებისმიერი ხელისუფლება მათ ადგილზე სწორედ იმავე განცხადებას გააკეთებდა. სამწუხაროდ, „ქართული ოცნების“ ხელისუფლებამ საზოგადოებაში ნდობა დაკარგა. ამიტომ ეჭვი მეპარება, რომ ამ დანაპირებში გულწრფელი იყოს. დღეს ხელისუფლებისთვის მთავარია გადააგოროს არსებული ვითარება,“ - განაცხადა ვახტანგ ძაბირაძემ.

შეგახსენებთ, რომ საქართველოს მთავრობა „ანაკლიის განვითარების კონსორციუმთან“ ხელშეკრულებას წყვეტს და შესაბამისი სამართლებრივი პროცედურების გატარებას იწყებს.

თენგიზ ფხალაძე - პოლიტიკურ ძალებს შორის ურთიერთობაში უნდა არსებობდეს ზღვარი, რომლის იქითაც პროცესი არ უნდა წავიდეს, თუკი ეს ზღვარი წაიშალა, მძიმე შედეგს მივიღებთ
ქართული პრესის მიმოხილვა 25.01.2020
ავთანდილ წულაძე - საქართველოსთან მიმართებაში რუსეთის სტრატეგიული მიზანი არსებული სტატუს-კვოს შენარჩუნებაა
„რადისონ ქოლექშენ, წინანდლის მამულის" ზამთრის შეთავაზება