ირაკლი მეზურნიშვილი - სამწუხაროდ, ხაზარაძის უპასუხისმგებლობის გამო ჩვენ 4 წელი დავკარგეთ

სამწუხაროდ, ხაზარაძის უპასუხისმგებლობის გამო ჩვენ 4 წელი დავკარგეთ, - ამის შესახებ საპარლამენტო უმრავლესობის წევრმა ირაკლი მეზურნიშვილმა განაცხადა. მისი თქმით, ინვესტორების თვალში მეტი სანდოობის მოსაპოვებლად „ქართულმა ოცნებამ“ ანაკლიის პროექტის განსაკუთრებული მნიშვნელობა ქვეყნის კონსტიტუციაში ასახა.

„ჩვენი ხელისუფლებისთვის უმნიშვნელოვანესია პორტების განვითარება. ჩვენ ქვეყანას ნამდვილად აქვს პოტენციალი, რომ გახდეს რეგიონში სატრანსპორტო და ლოგისტიკური ცენტრი. საქართველოს მოსახლეობას ახსოვს და ვერავინ მოატყუებს, თუ ვინ იყო ანაკლიის ღრმაწყლოვანი პორტის ინიციატორი, რომელი ხელისუფლების დროს გამოცხადდა ინტერესთა გამოხატვა და ვინ უჭერდა მხარს ამ პროექტის განხორცილებას წლების განმავლობაში, მათ შორის: ფინანსურადაც, მორალურადაც და თუნდაც საერთაშორისო ორგანიზაციებთან ურთიერთობის მხრივაც, იმაზე მეტადაც კი, ვიდრე მას კონტრაქტით ევალებოდა.

შეგახსენებთ, რომ სახელმწიფოს ვალდებულება პორტის ტერიტორიამდე რკინიგზის მიყვანაში, ასევე, გარკვეული მიწების გამოსყიდვასა და პორტისთვის გადაცემაში გამოიხატებოდა, თუმცა დამატებით, მთავრობის გადაწყვეტილებით, ანაკლიის კონსორციუმს საპარტნიორო ფონდმა 100 მილიონი დოლარის ოდენობის სუბორდინირებული სესხიც გამოუყო“, - განაცხადა ირაკლი მეზურნიშვილმა.

უმრავლესობის წევრის განცხადებით, პროექტის ინტერესებიდან გამომდინარე, სახელმწიფო კონსორციუმთან მიმართებაში არაერთ დათმობაზე წავიდა.

„2016 წლიდან დღემდე, „ანაკლიის განვითარების კონსორციუმის“ მოთხოვნით ხელშეკრულებაში 40-ზე მეტი ცვლილებაა შეტანილი. პროექტის დაწყებიდან დღემდე, სახელმწიფომ კონსორციუმს საკუთარი ვალდებულებების შესრულების დრო, იმ იმედით რომ პროექტი საბოლოოდ მაინც შემდგარიყო - 7-ჯერ გადაუვადა. თავის მხრივ, კონსორციუმს უნდა განეხორციელებინა მის მიერვე ინტერესთა გამოხატვაში დაფიქსირებული ისეთი ვალდებულებები, როგორიცაა: 120 მილიონ დოლარიანი კაპიტალის შევსება და 400 მილიონ დოლარიანი სესხის მოზიდვა, ორივე 2017 წლისთვის.

სამწუხაროდ, აღნიშნული ვალდებულება, არათუ 2017 წელს, არც 2018 წელს და ვერც 2019-ში ვერ შეასრულა. ხშირად საუბრობენ, რომ მას პროექტის განხორციელებაში ხელი შეეშალა ვითომცდა მთავრობის მიერ მის მიმართ ნეგატიური განწყობების გამო. გავიხსენოთ, რომ ხაზარაძე-ჯაფარიძის მიერ 17 მილიონის გათეთრების შესახებ საკითხი მხოლოდ და მხოლოდ 2019 წლის იანვარში გახდა ცნობილი, ანუ მინიმუმ 1 წლით გვიან, ვიდრე პროექტისთვის საჭირო ფინანსური რესურსი კონსორციუმს უკვე უნდა ჰქონოდა მოძიებული. უფრო მეტიც, პროექტის შეუსრულებლობისთვის მამუკა ხაზარაძემ არათუ პასუხისმგებლობა საკუთარ თავზე აიღო, არამედ პოლიტიკურ რეპრესიად შეაფასა და 2019 წლის ზაფხულში ორგანიზაცია „ლელოც“ კი დააფუძნა, რითაც, საბოლოოდ, შევიდა ქართულ პოლიტიკაში, თავისივე შეცდომების გადასაფარად და პოლიტიკური იმუნიტეტის მიღების იმედად. აღნიშნულ თარიღებში ნათლად ჩანს ყველა ის დეტალი, რომელიც ამ საკითხის ხაზარაძისეულ მიდგომას ძალიან მარტივად არათუ აბათილებს, არამედ მის არაკომპეტენტურობასა და ფულის შესაძლო გათეთრების საკითხის გადაფარვის მცდელობას უსვამს ხაზს“, - აღნიშნა ირაკლი მეზურნიშვილმა.

მისი შეფასებით, საქართველოს მთავრობამ მიიღო ერთადერთი სწორი და უალტერნატივო გადაწყვეტილება და ანაკლიის განვითარების კონსორციუმს ხელშეკრულება გაუწყვიტა.

„საქართველოს ხელისუფლება იყო და რჩება საკუთარი გადაწყვეტილების ერთგული. ანაკლიის ღრმაწყლოვანი პორტი კი მაინც აშენდება, უბრალოდ, “ანაკლიის განვითარების კონსორციუმის” გარეშე“,- განაცხადა ირაკლი მეზურნიშვილმა.

ალექსანდრე თვალჭრელიძე - „ქართული ოცნების“ ეკონომიკური პროგრამა გაცილებით უფრო მოკრძალებული, მაგრამ, ამავდროულად, გაცილებით უფრო რეალისტურია
გია ხუხაშვილი - თუ პროპორციულ არჩევნებში ხელისუფლებამ ვერ მოახერხა 40%-იანი ბარიერის გადალახვა, ხელისუფლებას მეორე ტურში შეიძლება შეექმნას სერიოზული პრობლემა
ქართული პრესის მიმოხილვა 17.09.2020
რან გიდორი - სწრაფვა მშვიდობისკენ კორონავირუსის დასამარცხებლად
"მემარცხენე ალიანსის" ლიდერი კახა ძაგანია - "ვხსნით ჩვენს პარტიას რეგისტრაციიდან და ვუერთდებით "პატრიოტთა ალიანსს"
ირმა ინაშვილი - ჩვენთან მიმართებაში გამოცხადებულია საინფორმაციო ბლოკადა
წინანდლის მამული რიგით მეორე მუსიკალურ ფესტივალს მასპინძლობს
წინანდლის მუზეუმს შარლ დე გოლის წერილები გადაეცა