აშშ-ის წარმომადგენელთა პალატამ მხარი დაუჭირა რეზოლუციას, რომელიც პრეზიდენტ დონალდ ტრამპს ირანის წინააღმდეგ სამხედრო მოქმედების დაწყების უფლებას უზღუდავს, - ამის შესახებ ინფორმაციას „როიტერსი“ ავრცელებს.
რეზოლუციის თანახმად, პრეზიდენტს კონგრესის თანხმობის გარეშე ირანის წინააღმდეგ ამერიკული ჯარის გამოყენების უფლება არ აქვს.
კანონმდებლებმა რეზოლუცია 224 ხმით 194-ის წინააღმდეგ დაამტკიცეს.
აშშ-ის წარმომადგენელთა პალატიდან რეზოლუცია სენატში გადაინაცვლებს, რომლის უმრავლესობას დონალდ ტრამპის „რესპუბლიკური პარტიის“ წევრები შეადგენენ.
აღსანიშნავია, რომ თუკი დოკუმენტს სენატიც დაუჭერს მხარს, მის ძალაში შესასვლელად ტრამპის ხელმოწერა საჭირო აღარ იქნება.
თეთრი სახლის განცხადებით, რეზოლუცია „სასაცილო“ და „პოლიტიკურად მოტივირებულია.“ „ის ძირს უთხრის აშშ-ის შესაძლებლობას, დაიცვას საკუთარი მოქალაქეები,“- ნათქვამია თეთრი სახლის მიერ გავრცელებულ განცხადებაში.