ზურაბ ბუდაღაშვილსა და შს სამინისტროს თანამშრომელს შორის სასამართლოზე შეკამათება მოხდა

თბილისის საქალაქო სასამართლოში 20 ივნისის საქმეზე დაკავებულების: ბესიკ თამლიანის, ზურაბ ბუდაღაშვილის, ცოტნე სოსელიასა და კახაბერ კუპრეიშვილის სასამართლო პროცესი გადაიდო. მორიგი სხდომა 13 იანვარს, 10:30 საათზე დაინიშნა.

დღევანდელ პროცესზე ბრალდების მხარის ორი მოწმე უნდა დაეკითხათ, თუმცა მათგან მხოლოდ ერთი, შინაგან საქმეთა სამინისტროს თანამშრომლის დაკითხვა მოხერხდა. მოწმის დაკითხვის შემდეგ, დაცვისა და ბრალდების მხარის თხოვნით, სასამართლო პროცესი გადაიდო.

ბრალდების მხარის მოწმემ 20 ივნისის ღამის დეტალები გაიხსენა. გარდა ამისა, ბრალდების მხარემ წარადგინა ვიდეომტკიცებულება, რომელშიც მოწმემ საკუთარი თავი ამოიცნო და ასევე სავარაუდოდ, ერთ-ერთი ბრალდებული ზურაბ ბუდაღაშვილი.

დაკითხვის დროს ბუდაღაშვილი მოწმესთან პოლემიკაში შევიდა და ჰკითხა, რა ნიშნით ამოიცნო ის კადრებში, რაზეც მოწმემ უპასუხა, რომ ის ვიდეოკადრებში მონაწილე ერთ-ერთი პირს "ჭაღარა თმით" მიამსგავსა.

როგორც სხდომის დასრულების შემდეგ ჟურნალისტებს ადვოკატმა ვახტანგ იაშვილმა განუცხადა, მოწმე არ იცნობს ბრალდებულებს და ფაქტის პირდაპირი მოწმე არ არის.

“დღევანდელ პროცესზე დაიკითხა მოწმე, რომელმაც სატელევიზიო ფირზე საკუთარი თავი ამოიცნო, თუმცა არანაირი ამოსაცნობი ნიშანი მას არ ჰქონდა, ეკეთა ჩაფხუტი, ასევე აირწინაღი, რობოკოპში იყო შემოსილი და მიუხედავად იმისა, რომ რამე ნიშანი არ იყო, ამოიცნო საკუთარი თავი და რამდენიმე ადამიანი. მოწმის თქმით, ჭაღარათმიანი ადამიანი იცანო ვიდეოზე. თვითონ მას ბუდაღაშვილი არ უნახავს, არ იცნობს, ამ კონკრეტული ფაქტის პირდაპირი მოწმე არ არის", - განაცხადა ადვოკატმა.