ჩვენ ველოდებით, როდის მოგვიტანენ თეფშზე დადებულ აფხაზეთს, მაგრამ ამას აქედან, დისტანცირებულად, რაღაც პროცესების სტიმულირება სჭირდება, - ამის შესახებ აფხაზეთის ავტონომიური რესპუბლიკის მინისტრთა საბჭოს ყოფილმა თავმჯდომარემ, ზურაბ ერქვანიამ „ინტერპრესნიუსს“ განუცხადა, როდესაც გამოეხმაურა ოკუპირებულ აფხაზეთში მიმდინარე მოვლენებს და 22 მარტს დანიშნულ ე.წ. საპრეზიდენტო არჩევნებს.
როგორც ერქვანიამ აღნიშნა, ოპოზიციონერ ასლან ბჟანიას, სავარაუდოდ, ჯანმრთელობის მდგომარეობა, რომელიც მისი მოწამვლის შემდეგ გაუარესდა, ე.წ. არჩევნებში მონაწილეობის საშუალებას არ მისცემს.
„ბჟანიას ძალიან ახლოს ვიცნობ. ის ფიზიკურად არ არის ჯანმრთელი, ხან კარგად არის, ხან - ცუდად. ბჟანიას სისხლში აქვს პრობლემები და მისი დაცვის ორი თანამშრომელიც კარგად არ არის, მათაც იგივე პრობლემები აღმოაჩნდათ სისხლში. იქ ისეთი ვითარებაა, რომ ჯერჯერობით ეს საკითხი ღიაა.
ჩვენკენ კი იქიდან არავინ იხედება, ეს ჩვენი ილუზიებია, რადგან ჩვენ ამ ხალხთან არ ვმუშაობთ და ეს ასე ამიტომაა. ჩვენ ვზივართ და ველოდებით, როდის მოგვიტანენ თეფშზე დადებულ აფხაზეთს. ამას აქედან, დისტანცირებულად რაღაც პროცესების სტიმულირება სჭირდება“, - აღნიშნა ერქვანიამ.
შეგახსენებთ, ოკუპირებული აფხაზეთის დე ფაქტო პრეზიდენტმა რაულ ხაჯიმბამ ხელი მოაწერა ბრძანებას თანამდებობიდან ნებაყოფლობით გადადგომის შესახებ. ოკუპირებული აფხაზეთის ე.წ. ცენტრალური საარჩევნო კომისიის ცნობით, დე ფაქტო პრეზიდენტის არჩევნები 22 მარტს გაიმართება.