ვარკეთილში, „ანას ბაღში” შეკრებილმა მოსახლეობამ აქცია-პერფორმანსი გამართა. მათ სახეზე ნიღბები გაიკეთეს და ბავშვებს მშენებლობის კედლების მიღმა სიმინდის, ლობიოსა და სხვა მცენარეების თესლები გადააყრევინეს.

ადგილობრივების განცხადებით, აღნიშნული პერფორმანსი ადგილზე მწვანე სივრცის და ჯანსაღი გარემოს შექმნას ემსახურება.

„აქცია პერფორმანსის მიზანი იყო ის, რომ საშინლად არის დაბინძურებული გარემო და ჰაერი. გადავწყვიტეთ, ამისთვის ხაზი გაგვესვა. არ გვინდა ბეტონში ამოქოლვა, ჩვენ გვჭირდება მეტი მწვანე სივრცე, მეტი სუფთა ჰაერი, ჯანსაღი გარემო და ამიტომ, ჩვენს ბავშვებს გადავაყრევინეთ თესლი ტრაქტორის მიერ ამოთხრილ მიწაში. ჩვენ დაგეგმილი გვაქვს კიდევ არაერთი აქცია და მოქმედებები, წინააღმდეგობას გავუწევთ მათ მანამ, ვიდრე არ დაკმაყოფილდება ჩვენი მოთხოვნები,” - განაცხადა ადგილობრივმა მამუკა დარისპანაშვილმა.