თავდაცვის ყოფილი მინისტრის, ირაკლი ოქრუაშვილის დაცვის წევრის, კობა კოშაძის ადვოკატის, მამუკა ჭაბაშვილის განცხადებით, მისი დაცვის ქვეშ მყოფმა თავად ნახა, თუ როგორ ჩაუდეს სამართალდამცავებმა იარაღი.

დღევანდელ სასამართლო პროცესზე ბრალდების მხარის მტკიცებულებებს გამოიკვლევენ.

„წერილობით მტკიცებულებებს გამოვიკვლევთ, მათ შორის, დაქტილოსკოპიურ, ბიოლოგიურ ექსპერტიზებს, რომლებიც ადასტურებენ, რომ აღნიშნულ იარაღთან კობა კოშაძეს არანაირი კავშირი არ ჰქონია.

თავად კობა კოშაძე აცხადებს, რომ იარაღის „ჩადება“ მოხდა და ეს ლოგიკურია. მას პოლიცია თითქოს, მისდევდა და აფრთხილებდა გააჩერეო, მან არ გააჩერა და ამის მიუხედავად, თურმე, იარაღი თვალნათლივ ედო სავარძლებს შორის, ხელის მუხრუჭთან და არც კი უცდია დაემალა სავარძლის ქვეშ, ან სხვაგან. გასაგებია, რომ მას იარაღი „ჩაუდეს“ და ეს მან საკუთარი თვალით ნახა", - განაცხადა მამუკა ჭაბაშვილმა.

ცნობისთვის, თავდაცვის ყოფილი მინისტრის დაცვის წევრს, კობა კოშაძეს ცეცხლსასროლი იარაღის და საბრძოლო მასალის უკანონო შეძენა-შენახვას, ტარებას ედავებიან.