საკრებულოს ბრალდებული დეპუტატის, ილია ჯიშკარიანის საქმის პროკურორის, თამარ იაკობიძის განცხადებით, მიუხედავად იმისა, რომ გამომძიებლის მიერ ჩატარებულ საგამოძიებო მოქმედებებს დაცვის მხარე უდავოდ სცნობდა, ის მაინც დაკითხეს.
„გამომძიებლის მიერ ჩატარებულ საგამოძიებო მოქმედებებთან დაკავშირებით გარკვეული კითხვის ნიშნები ჰქონდა დაცვის მხარეს. მიუხედავად აღნიშნულისა, დაცვის მხარე მიიჩნევდა, რომ უდავოდ უნდა ყოფილიყო მიჩნეული მის მიერ ჩატარებული საგამოძიებო მოქმედებები. ჩავთვალეთ, რომ კითხვის ნიშნები არ უნდა ყოფილიყო საგამოძიებო მოქმედების ირგვლივ. გამომძიებელმა დეტალურად ისაუბრა იმ ფაქტობრივ გარემოებაზე, რატომ ათვალიერებდა შემთხვევის ადგილს გვიან, გამოძიების თავისებურება ახსნა და ახსნა ის გარემოება, თამთა თოდაძის გამოკითხვა აუცილებელი იყო. როგორც გამომძიებელმა ისაუბრა, მას შემდეგ, რაც მოცემულ სისხლის სამართლის საქმეზე დაიწყო გამოძიება, გამოიკითხა თამთა თოდაძე, რის შემდეგაც მასთან ჩატარდა ტანისამოსის ამოღება, ამის შემდეგ თამთა თოდაძის მონაწილეობით ჩატარდა შემთხვევის ადგილის დათვალიერება, ვინაიდან მისი მონაწილეობა აუცილებელი იყო. თუმცა, გამომძიებელმა ხაზი გაუსვა იმ გარემოებას, რომ შემთხვევის ადგილი დაცული იყო იმ პერიოდში, რა პერიოდშიც თამთა თოდაძესთან პოლიციაში საგამოძიებო მოქმედებები მიმდინარეობდა“, - განაცხადა იაკობიძემ.
შემდეგი სასამართლო სხდომა 30 იანვარს, 13:00 საათზე გაიმართება.