თბილისის საქალაქო სასამართლოში თავდაცვის ყოფილი მინისტრის, „გამარჯვებული საქართველოს” ლიდერის, ბრალდებულ ირაკლი ოქრუაშვილის მორიგი სასამართლო პროცესი მიმდინარეობს.

როგორც ჟურნალისტებს პროცესის დაწყებამდე პროკურორმა, გიორგი მუკბანიანმა განუცხადა, დღევანდელ პროცესზე ბრალდების მხარის სამი მოწმე, ორი გამომძიებელი და შინაგან საქმეთა სამინისტროს პრესცენტრის თანამშრომელი დაიკითხება.

პროკურორის ცნობით, ამ გამომძიებლებმა აღნიშნულ სისხლის სამართლის საქმეზე გამოძიება ჩაატარეს და დღევანდელ პროცესზე ამ გამოძიების კანონიერებაზე ისაუბრებენ. რაც შეეხება მესამე მოწმეს, პროკურორის ინფორმაციით, მისგან სხვადასხვა სახით ვიდეომტკიცებულებები გამოითხოვეს.

რაც შეეხება ირაკლი ოქრუაშვილს, ადვოკატ ვახტანგ იაშვილის ინფორმაციით, ის პროცესს არ დაესწრება.

ცნობისთვის, ირაკლი ოქრუაშვილი 20 ივნისის აქციის დარბევისას სისხლის სამართლის კოდექსის 225-ე მუხლით გათვალისწინებული დანაშაულისთვის დააკავეს, რაც ჯგუფური ძალადობის ორგანიზებას, ხელმძღვანელობას და მასში მონაწილეობას გულისხმობს.