საფრანგეთის პრეზიდენტის, ემანუელ მაკრონის თქმით, ის მზადაა უფრო ახლო ურთიერთობები დაამყაროს რუსეთთან. ამის შესახებ მაკრონმა ფრანგულ გამოცემა RFI-ის ჟურნალისტთან საუბრისას განაცხადა.

ჟურნალისტმა მაკრონს შეკითხვა დაუსვა, თუ რამ განაპირობა მისი პოზიციის შეცვლა ვლადიმერ პუტინთან მიმართებაში.

„ეს გადაწყვეტილება დროთა მანძილზე მოვიდა. ეს იყო ისტორიული და სტრატეგიული განსჯის შედეგი“,-განაცხადა პრეზიდენტმა.

ჟურნალისტმა მაკრონს რუსეთის მიერ მეზობელ ქვეყნებთან არსებულ კონფლიქტებზე ჰკითხა, რაც „საერთო ევროპის უსაფრთხოების არქიტექტურას“ არღვევს. საფრანგეთის პრეზიდენტის თქმით, თუ ყველა გაყინული კონფლიქტის მოგვარებას დაელოდები იმისთვის, რომ წინ წახვიდე, ლოდინი დიდხანს მოგიწევს.

„რუსეთმა უკრაინის ნაწილი დაიპყრო და ჩვენ მივიღეთ ზომები. ჩვენ ვცდილობთ გაყინული კონფლიქტების გადაჭრას, მაგრამ თუ ყველა გაყინული კონფლიქტის მოგვარებას დაელოდები იმისთვის, რომ წინ წახვიდე, ლოდინი დიდხანს მოგიწევს“,- განაცხადა მაკრონმა.

იხილეთ ვიდეო: მაკრონის თქმით, ის მზადაა უფრო ახლო ურთიერთობები დაამყაროს რუსეთთან