ის, რომ ქართულმა მხარემ არ მოითხოვა ლავასოღლის ექსტრადიცია, არ შეესაბამება სიმართლეს,- ამის შესახებ იუსტიციის მინისტრმა თეა წულუკიანმა ჟურნალისტებთან განაცხადა.
მისივე ინფორმაციით, ლავასოღლი თურქულმა მხარემ სწორედ იმიტომ დააკავა, რომ მისი ექსტრადიცია საქართველომ მოითხოვა.
„პროცედურები კვლავ მიმდინარეობს. მოთხოვნილი რადგან იყო, ამიტომ დააკავეს, სხვა მიზეზი თურქულ მხარეს, ალბათ, არ ჰქონდა. დააკავეს, როცა ქართულმა პროკურატურამ მოითხოვა მისი ექსტრადიცია. შესაბამისად, ის, რომ ქართულმა მხარემ მისი ექსტრადიცია არ მოითხოვა დოკუმენტურად, არ შეესაბამება სიმართლეს“, - განაცხადა თეა წულუკიანმა.
თურქული მედიის ცნობით, საქართველო უარს აცხადებს მიიღოს ე.წ. კრიმინალური ავტორიტეტი მინდია გორაძე, იგივე მინდია ლავასოღლი, რომლის ექსტრადიციასაც ქვეყანაში თურქეთი გეგმავს. მედიის ცნობით, ლავასოღლის საქართველოში ექსტრადიციის ბოლო ვადა თებერვალში იწურება და თუ თბილისი მის მიღებაზე კვლავ უარს განაცხადებს, ანკარას მოუწევს მისი გათავისუფლება.