საქართველოს განათლების, მეცნიერების, კულტურისა და სპორტის სამინისტროსა და განათლების ხარისხის განვითარების ეროვნულ ცენტრის ხელშეწყობით, თბილისის დავით აღმაშენებლის სასწავლო უნივერსიტეტის სტუდენტები, ავტორიზაციის გაუქმების გამო, სწავლას სხვადასხვა ავტორიზებულ უმაღლეს სასწავლებლებში გააგრძელებენ.
როგორც „ინტერპრესნიუსს“ საქართველოს განათლების, მეცნიერების, კულტურისა და სპორტის სამინისტროდან აცნობეს, ამ მიზნით, მათთვის ამ დღეებში რიგგარეშე მობილობა გამოცხადდება, რომლის პროცედურები, მათ განათლების ხარისხის განვითარების ეროვნულ ცენტრში სტუდენტებს ღია კარის დღეზე უკვე გააცნეს.
მათივე ინფორმაციით, განათლების ხარისხის განვითარების ეროვნულ ცენტრში გამართულ შეხვედრაზე სტუდენტებმა უკვე მიიღეს ინფორმაცია, თუ რომელი ავტორიზებული უმაღლესი საგანმანათლებლო დაწესებულებები მიიღებენ მონაწილეობას მათთვის სპეციალურად გამოცხადებულ რიგგარეშე მობილობაში.
მათივე ინფორმაციით, უმაღლესი საგანმანათლებლო დაწესებულებების ავტორიზაციის საბჭოს გადაწყვეტილებით, თბილისის დავით აღმაშენებლის სასწავლო უნივერსიტეტს ავტორიზაცია 2019 წლის 20 დეკემბერს გაუუქმდა. აღნიშნული გადაწყვეტილება ძალაში 2020 წლის 15 თებერვლიდან შედის თუმცა, სტუდენტთა ინტერესების გათვალისწინებით, უმაღლესი განათლების მიღმა არცერთი სტუდენტი არ დარჩება.