საქართველოში „ევრობასკეტ 2021“-სთვის ახალი დარბაზი აშენდება. ამის შესახებ „ინტერპრესნიუსს“ ინფორმაცია კალათბურთის ფედერაციაში დაუდასტურეს.

კერძოდ, ოლიმპიური სასახლის რეკონსტრუქცია აღარ მოხდება და მის ნაცვლად, ამავე შენობის გვერდით ახალი 10 000-კაციანი დარბაზი აშენდება. ახალ დარბაზს კი ორდონიანი, 400 მანქანაზე გათვლილი პარკინგი ექნება.

განათლების, მეცნიერების, კულტურისა და სპორტის მინისტრის მოადგილის, შალვა გოგოლაძის განმარტებით, ახალი შენობის დიზაინს მთავრობა ორ-სამ კვირაში წარადგენს.

ოფიციალური სამუშაოები კი დღეიდან დაიწყება და 2021 წლის მაისში ან ივნისში დასრულდება.

ახალი დარბაზი გვირაბებით ოლიმპიური სასახლის უკვე არსებულ შენობებს დაუკავშირდება და ერთიანი სპორტული კომპლექსი 3 დარბაზით, გათვლილი 10 000, 3 000 და 800 მაყურებელზე იქნება.

შეგახსენებთ, ევრობასკეტი 2021 ოთხ ქვეყანაში: საქართველოში (თბილისი), ესტონეთში (ტალინი), ჩეხეთსა (პრაღა) და გერმანიაში (კიოლნი, ჯგუფური; ბერლინი, ფინალი) ჩატარდება. ტურნირი 2 სექტემბერს დაიწყება და 19 სექტემბრამდე გასტანს.