მოძრაობა "გაბედეს" წევრებმა „რედისონის“ წინ აქცია განაახლეს. როგორც "ინტერპრესნიუსს" აქციის მონაწილემ გოგა ფოლადაშვილმა განუცხადა, მათ „რედისონთან“ აქცია იმ მიზნით განაახლეს, რომ სურთ კონკრეტულ მნიშვნელოვან საკითხებზე ადამიანის უფლებათა დაცვის კომიტეტის თავმჯდომარეს სოფო კილაძეს გაესაუბრნონ, რომელიც სასტუმრო „რედისონში" იმყოფება. „რედისონში“ ადამიანის უფლებათა დაცვის კომიტეტის ანგარიშის წარდგენა მიმდინარეობს.
გოგა ფოლადაშვილის თქმით, ისინი საუბარს ასევე აპირებენ იმ უცხოელ დიპლომატებთან, რომლებიც ადამიანის უფლებათა დაცვის კომიტეტის ანგარიშის წარდგენას ესწრებიან.
"ჩემი აზრით, დღევანდელ ანგარიშში შეტანილი არ ექნებოდა 20 ივნისის მოვლენები და სხვა მნიშვნელოვანი საკითხები,რაზეც მათთან გვინდა საუბარი", - განაცხადა ფოლადაშვილმა.
ამასთან, "გაბედეს" წევრები მიიჩნევენ, რომ "ქართული ოცნების" ხელისუფლების მიმართ კონკრეტული სანქციები უნდა დაწესდეს.