გენერალური პროკურორი 100%-ით ირაკლი შოთაძე იქნება, - ამის შესახებ ფრაქცია "ნაციონალური მოძრაობის" თავმჯდომარე რომან გოცირიძემ ჟურნალისტებს განუცხადა, რითაც გამოეხმაურა გენერალური პროკურორობის კანდიდატად ირაკლი შოთაძის წარდგენას. რომან გოცირიძე, დანარჩენ 16 კანდიდატს ურჩევს, რომ კონკურსი პროტესტის ნიშნად დატოვონ, ან ეს პროცესი ხელისუფლების მხილებისთვის გამოიყენონ.

"გენერალური პროკურორის შერჩევის პროცესი არის ილუზია, თითქოს დემოკრატიულად მიმდინარეობს ეს და თითქოს მართლა 16 კანდიდატი მონაწილეობდეს. გენერალური პროკურორი 100% -ით ირაკლი შოთაძე იქნება, ვინაიდან ივანიშვილს სურს, რომ მორჩილებაში მყოფი იყოს ამ პოსტზე, განსაკუთრებით ისეთი, ვინც ერთხელ უკვე არის ნაცადი და გასვრილი. ამიტომ დანარჩენმა 16-მა კანდიდატმა არ უნდა შეასრულოს ლეღვის ფოთლის როლი მზეჭაბუკის სხეულზე. ამიტომ მათი წესიერი ქცევა იქნებოდა ის, რომ ან პროცესი დაეტოვონ პროტესტის ნიშნად, ან ეს პროცესი გამოიყენონ ხელისუფლების მხილებისთვის. მათთვისაც შეურაცხმყოფელია, რომ წინასწარ ვიცით, ვის დასვამენ გენერალურ პროკურორად და მაინც მონაწილეობენ იმ პროცესში, სადაც შანსი ნულია,"- განაცხადა გოცირიძემ.