განათლება იმდენად დიდი სფეროა, რომ ცალკე მართვის სისტემა სჭირდება. ამდენად, მართებულია ეს გადაწყვეტილება, - ასე შეაფასა ექსპერტმა განათლების საკითხებში გია მურღულიამ „ინტერპრესნიუსთან“ განათლებისა და კულტურის სამინისტროს გაყოფასთან დაკავშირებული მთავრობის გადაწყვეტილება.
მისივე შეფასებით, განათლების და კულტურის შეერთებას რომ შედეგი გამოეღო, მთავრობა ამ გადაწყვეტილებას არ მიიღებდა.
„თავის დროზე რომ ეს სწორი გადაწყვეტილება ყოფილიყო, ალბათ, ახლა არ გაყოფდნენ. მე ვფიქრობ, რომ განათლების სფერო იმდენად დიდი სფეროა, რომ ალბათ ცალკე მართვის სისტემა სჭირდება, ამდენად ალბათ მართებულია ეს გადაწყვეტილება. გამოცდილება აჩვენებს, რომ ისეც შეიძლება მართვა და ასეც შეიძლება მართვა. უბრალოდ, როდესაც ამხელა სფეროზე ვლაპარაკობთ, ჩემი აზრით, უმჯობესია, რომ ცალკე იყოს განათლების სისტემა. ეს არის ცალკე, მოცულობითი სისტემა ბევრი პრობლემით და ბევრი ადამიანი მონაწილეობს ამ სფეროში. იმდენი სეგმენტისგან შედგება, რომ ალბათ სჯობს რომ იყოს ცალკე“, - განაცხადა ექსპერტმა.
ცნობისთვის, განათლების და კულტურის სამინისტროების კვლავ გაყოფასთან დაკავშირებით მთავრობაში გადაწყვეტილება მიღწეულია. ამის შესახებ „ინტერპრესნიუსთან“ საუბრისას პარლამენტის განათლების, მეცნიერებისა და კულტურის კომიტეტის თავმჯდომარის პირველმა მოადგილემ ნუკრი ქანთარიამ განაცხადა და განმარტა, რომ უწყებების გამოყოფის პროცესი თებერვალში დაიწყება.