კახაბერ კუჭავა და ირაკლი ბერაია ევროპარლამენტის ვიცე-პრეზიდენტს შეხვდნენ

საქართველოს პარლამენტის თავმჯდომარის მოადგილე კახაბერ კუჭავა და საგარეო ურთიერთობათა კომიტეტის თავმჯდომარე ირაკლი ბერაია ევროპარლამენტის ვიცე - პრეზიდენტს, ჰაიდი ჰაუტალასს შეხვდნენ. ამის შესახებ „ინტერპრესნიუსს“ საქართველოს პარლამენტიდან აცნობეს.

მათივე ინფორმაციით, ქართველმა პარლამენტარებმა ევროპელ კოლეგას დეტალური ინფორმაცია მიაწოდეს ქვეყანაში განხორციელებული დემოკრატიული რეფორმების შესახებ. ვრცლად მიმოიხილეს საკონსტიტუციო და სასამართლო რეფორმები და ევროინტეგრაციის მიმართულებით მიღწეული პროგრესი.

“შეხვედრისას განსაკუთრებული ყურადღება დაეთმო საქართველოს ოკუპირებულ ტერიტორიებზე უსაფრთხოების და ჰუმანიტარული კუთხით არსებულ მძიმე ვითარებას, ოკუპირებულ აფხაზეთში ბოლო დროს განვითარებულ პროცესებს, ოკუპირებულ ახალგორში გადასასვლელის ჩაკეტვით გამოწვეულ პრობლემებს და „ბორდერიზაციის" უკანონო პროცესს.

ქართველმა კანონმდებლებმა ხაზგასმით აღნიშნეს საერთაშორისო საზოგადოების, პირველყოვლისა ევროკავშირის მხრიდან, რუსეთზე ზეწოლის გაზრდის აუცილებლობა ამ უკანასკნელის მიერ ნაკისრი ვალდებულებების შესრულების მიზნით. მათ შეხვედრისას, ევროპარლამენტის დღის წესრიგში საქართველოს ოკუპირებული ტერიტორიების საკითხის მუდმივი შენარჩუნების მნიშვნელობას გაუსვეს ხაზი. საქართველოს პარლამენტის დელეგაციის წარმომადგენლებმა, ევროპარლამენტის ვიცეპრეზიდენტს, ჰაიდი ჰაუტალასს საქართველოს სუვერენიტეტისა და ტერიტორიული მთლიანობის მხარდაჭერისთვის მადლობა გადაუხადეს,“ - ნათქვამია ინფორმაციაში.

გიორგი ანთაძე - საქართველომ რეგიონში არსებული სამხედრო დისბალანსის გათვალისწინებით, თავისი თავდაცვის შესაძლებლობების გაუმჯობესებისკენ უფრო ქმედითი ნაბიჯები უნდა გადადგას
ქართული პრესის მიმოხილვა 03.08.2020
ალექსანდრე თვალჭრელიძე -  გაბრაზებული ამომრჩევლები ხმას მცირე პარტიებს მისცემენ, პარლამენტის გასაღები სწორედ მცირე პარტიების და  ახალი სახეების ხელშია
„ნიუ ჰაუსი“ მომხმარებელს 27-თვიან შიდა უპროცენტო განვადებას სთავაზობს - იცხოვრე კომფორტულ გარემოში