ამერიკის შეერთებული შტატების პრეზიდენტი, დონალდ ტრამპი დავოსის ეკონომიკურ ფორუმზე სიტყვით გამოვიდა. პრეზიდენტმა ყურადღება ამერიკის მიერ მისი პრეზიდენტობის დროს მიღწეულ წარმატებებზე გაამახვილა და გაზრდილ სამუშაო ადგილებზე, საერთაშორისო სავაჭრო ხელშეკრულებებსა და სოციალურ პროექტებზე ისაუბრა.

„უზარმაზარი სიმდიდრე მოედინება ისეთ ადგილებში, რომელთაც ბოლო 100 წლის მანძილზე არაფერი უნახავთ. დედამიწაზე არ არსებობს უკეთესი ადგილი, ვიდრე შეერთებული შტატები“,-განაცხადა ტრამპმა.

დონალდ ტრამპმა გარემოსდაცვით საკითხებზეც გაამახვილა ყურადღება და გარემოსდამცველ აქტივისტებს „სიკვდილის მაუწყებლები“ უწოდა. მისი თქმით, „შიში და ეჭვი არ არის კარგი აზროვნების პროცესი“.

დონალდ ტრამპის განცხადებით, აშშ უერთდება 1 ტრილიონი ხის ინიციატივას, რომელიც მიზნად ისახავს მსოფლიოს მასშტაბით 1 ტრილიონი ხის დარგვას.

ცნობისთვის, შვეიცარიაში, ქალაქ დავოსში მსოფლიო ეკონომიკური ფორუმი იმართება, რომელსაც მსოფლიო ლიდერები ესწრებიან.