ეუთო/ოდირი საარჩევნო სისტემის საკითხზე ოპოზიციის მიერ მომზადებულ წინადადებასთან დაკავშირებით დასკვნას „უახლოეს კვირებში“ გამოგზავნის.
კანონპროექტთან დაკავშირებით ორგანიზაციას შეკითხვით „ინტერპრესნიუსმა“ მიმართა, საიდანაც საპასუხო წერილი მიიღო.
„იურიდიულ მოსაზრებაზე მუშაობა საარჩევნო კანონპროექტთან დაკავშირებით ჯერ კიდევ მიმდინარეობს. იმედი გვაქვს, რომ სამუშაოები უახლოეს კვირებში დასრულდება“, - აცნობეს „ინტერპრესნიუსს“ ეუთო/ოდირიდან.
შეგახსენებთ, რომ საარჩევნო სისტემასთან დაკავშირებით ოპოზიციური პარტიების მიერ შემუშავებული კანონპროექტი შესაბამისი სამართლებრივი ექსპერტიზისთვის ეუთო/ოდირს სახალხო დამცველის ოფისმა გაუგზავნა.
საარჩევნო სისტემის ცვლილებასთან დაკავშირებით ოპოზიციის მიერ შემუშავებული კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, თუმცა შეიცვლება მანდატების განაწილების წესი.