ნიდერლანდები ღრმად შეშფოთებულია საქართველოს რეგიონებში -აფხაზეთსა და სამხრეთ ოსეთში არსებული ვითარებითა და უკანასკნელ პერიოდში განვითარებული მოვლენებით, - ამის შესახებ საქართველოში ვიზიტად მყოფმა ნიდერლანდების საგარეო საქმეთა მინისტრმა სტეფ ბლოკიმ განაცხადა. მისი თქმით, უსაფრთხოების მიმართულებით იმ გამოწვევების ფონზე, რომელთა წინაშეც საქართველო დგას, მის მიერ განხორციელებული რეფორმები ნამდვილად შთამბეჭდავია.

„გატარებული რეფორმები განსაკუთრებით შთამბეჭდავია იმის გათვალისწინებით, რომ ქვეყანაში რთული ვითარებაა უსაფრთხოების მიმართულებით. ნიდერლანდები ღრმად შეშფოთებულია საქართველოს რეგიონებში - აფხაზეთსა და სამხრეთ ოსეთში არსებული ვითარებითა და უკანასკნელ პერიოდში განვითარებული მოვლენებით, განსაკუთრებით ადამიანის უფლებების მიმართულებით არსებული ვითარებით. ვაპირებ დღეს მოვინახულო ევროკავშირის მონიტორინგის მისია ადმინისტრაციულ საზღვართან. კიდევ ერთხელ ხაზგასმით მინდა გამოვაცხადო სრული მხარდაჭერა საქართველოს დამოუკიდებლობის, სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში“, - განაცხადა სტეფ ბლოკიმ.