ჩრდილოეთ კორეამ ქვეყანაში უცხოელი ტურისტების შესვლა აკრძალა, მანამ, ვიდრე ახალი კორონავირუსის საწინააღმდეგო ვაქცინა არ შემუშავდება. როგორც ცნობილია, ქვეყანას ძირითადად ჩინელი ტურისტები სტუმრობენ.
ერთ-ერთმა ტურისტულმა სააგენტომ „როიტერსს“ ინფორმაცია დაუდასტურა. „უცხოელი ტურისტების შემოსვლა დროებით აკრძალულია, სანამ კორონავირუსი კონტროლირებადი არ გახდება. ჩრდილოეთ კორეა ასეთ რისკებს ძალიან სერიოზულად უდგება“,-განუცხადეს გამოცემას სააგენტო „ახალგაზრდა პიონერთა ტურში“.
შეგახსენებთ, ჩინეთში, ახალი კორონავირუსით გარდაცვლილთა რაოდენობა 9-მდე გაიზარდა. ეროვნული ჯანდაცვის კომისიის ცნობით, ქვეყნის მასშტაბით ვირუსის 440 დადასტურებული შემთხვევა ფიქსირდება. ახალი კორონავირუსით დაავადების შემთხვევები აღმოჩენილია აშშ-ში, ტაივანში, ტაილანდში, იაპონიასა და სამხრეთ კორეაში.