ისღა დარჩენიათ ამერიკელი იმპერიალისტებიო დაამატონ და მათი გამონათქვამი საბჭოთა კომკავშირელთა გამონათქვამების იდენტური იქნება, - ასე შეაფასა დამოუკიდებელმა დეპუტატმა დავით ჭიჭინაძემ „ქართული ოცნების“ წევრების რეაქცია კონგრესმენების წერილზე.

მისივე შეფასებით, როდესაც უცხოელი ბიზნესმენი ნახავს, რომ საქართველოზე ყველა ჟურნალ-გაზეთში ცუდი იწერება და წაიკითხავს, რომ საქართველოში მდგომარეობა გაუარესდა, ქვეყანაში ფულის ჩადებაზე აღარავინ იფიქრებს .

„ჩვენი ეკონომიკა არ არის მდგრადი ეკონომიკა, ძალიან მოწყვლადია და სწორედ ამ გარე შეფასებებზეა დამოკიდებული. აი ამიტომ არის ამ ნაწილშია მათი შეფასებები მნიშვნელოვანი. ახლა კი, კონგრესმენების, სენატორების წერილებს შეიძლება მოჰყვეს იმ შესაბამისი ფინანსური ინსტიტუტების გადაწყვეტილებები, რომ ქვეყანაში არასტაბილური ეკონომიკური ვითარებაა. და „ოცნების“ ეს ახალგაზრდები რომ გამოდიან და კონგრესმენების განცხადებებზე გაუგონარ რაღაცებს ამბობენ, ბარემ, ერთი სიტყვა, ამერიკელი იმპერიალისტებიო დაამატონ და მათ გამონათქვამებსა და საბჭოთა კომკავშირელთა გამონათქვამებს შორის განსხვავებაც აღარ იქნება. ისე, ვენესუელას ლიდერი, მადუროც ასეა. მოკლედ, „მოყვარეს პირში უძრახეო“, ქართველების ნათქვამია, ამერიკელების არა და როდესაც რაღაცაზე მიგითითებენ, უნდა გაითვალისწინო“, - განაცხადა დავით ჭიჭინაძემ.