ბრალდების მხარის მოწმემ განმარტა, რომ პარლამენტში შესვლას ითხოვდა დაახლოებით 30-40 კაცი, რომელთაც წინ მიუძღვოდა ირაკლი ოქრუაშვილი, - ამის შესახებ 20 ივნისის საქმეზე დაკავებული თავდაცვის ყოფილი მინისტრის, ირაკლი ოქრუაშვილის საქმის პროკურორმა გიორგი მუკბანიანმა სხდომის დასრულების შემდეგ განაცხადა.

მისივე თქმით, შემდეგ სხდომებზეც გაგრძელდება ბრალდების მხარის მოწმეების დაკითხვა.

„დღეს დაიკითხა საქმის ერთ-ერთი გამომძიებელი და ასევე დაიკითხა მოწმე, რომელმაც მიაწოდა ინფორმაცია სასამართლოს იმ ფაქტთან დაკავშირებით, რომ ის იმყოფებოდა ჭიჭინაძის ქუჩაზე, სადაც მისული იყო ირაკლი ოქრუაშვილი და ითხოვდა პარლამენტში შესვლას. ასევე მოწმემ განმარტა, რომ პარლამენტში შესვლას ითხოვდა დაახლოებით 30-40 კაცი, რომელთაც წინ მიუძღვოდა ირაკლი ოქრუაშვილი და ესაუბრებოდა მათ”,- განაცხადა პროკურორმა.

ცნობისთვის, ირაკლი ოქრუაშვილი 20 ივნისის აქციის დარბევისას სისხლის სამართლის კოდექსის 225-ე მუხლით გათვალისწინებული დანაშაულისთვის დააკავეს, რაც ჯგუფური ძალადობის ორგანიზებას, ხელმძღვანელობას და მასში მონაწილეობას გულისხმობს.