ხორავას საქმე არის კარგი მაგალითი იმისა, როგორ შეიძლება პროკურატურამ მთლიანად სისტემას მიაყენოს ზიანი, მაშინ პროკურატურას შოთაძე ხელმძღვანელობდა,- ამის შესახებ „ევროპული საქართველოს“ წევრმა სერგი კაპანაძემ ჟურნალისტებთან გენპროკურორად ირაკლი შოთაძის კანდიდატურის წარდგენასთან დაკავშირებით განაცხადა.
მისივე თქმით, ხორავას საქმე გამოძიების პირველივე ეტაპზე მარტივად გაიხსნებოდა, სურვილი რომ ჰქონოდათ და ხელი არავისთვის დაეფარებინათ.
„ის, რომ დღეს მივიღეთ ასეთი აბსურდული მდგომარეობა, ის რომ ამას მოჰყვა სერიოზული გამოსვლები, უსამართლობის განცდის დამკვიდრება, ეს ყველაფერი არის შედეგი მაშინდელი სამარცხვინო პროკურატურის, რომელმაც ხელი დააფარა კონკრეტულ ადამიანს და რომელსაც შეიძლებოდა საქმე გაეყალბებინა. იმ პროკურატურას მაშინ ხელმძღვანელობდა ბატონი შოთაძე. ეს ყველაფერი არის კარგი მაგალითი იმისა, როგორ შეიძლება პროკურატურამ ერთი საქმით მთლიანად სისტემას მიაყენოს ზიანი და გააფუჭოს საქმე. ძალიან სამწუხარო ის არის, რომ დღეს ხელისუფლება ისევ აპირებს, რომ შოთაძე დააბრუნოს პროკურატურაში, ამას ყველანი ერთად უნდა შევეწინააღმდეგოთ“,- განაცხადა სერგი კაპანაძემ.