„ნაციონალური მოძრაობის“ წევრის, ლილე ლიპარტელიანის განცხადებით, საკრებულოს შენობაში მათი ფრაქციის თანამშრომლებს არ უშვებენ.

ლიპარტელიანმა საკრებულოში იმ ადამიანების სია მიიტანა, ვისაც შენობაში შესვლა სურს და აპირებს ეს ჩამონათვალი უწყების თავმჯდომარეს, გიორგი ტყემალაძეს გადასცეს, რათა მან ამ ადამიანების შეშვების ნებართვა გასცეს.

„ჩვენი ფრაქციის თანამშრომლებსაც კი არ უშვებენ საკრებულოში. დაკეტილია აბსოლუტურად ყველა კარი, არცერთ ადამიანს არ უშვებენ იმის გამო, რომ აქ თურმე რაღაც პრობლემაა. „ქართულო ოცნებავ“, ეს არ არის თქვენი ოფისი, ეს არის ადმინისტრაციული ორგანო, სადაც მოქმედებს წესები შემოსვლაზე და გასვლაზე და ჩვენ, როგორც საკრებულოს წევრებს, უფლება გვაქვს ადამიანების შემოყვანის“,- განაცხადა ლიპარტელიანმა.

შეგახსენებთ, დღეს თბილისის საკრებულოს „ქართული ოცნების" დეპუტატებსა და „ნაციონალური მოძრაობის" წევრ ლევან ხაბეიშვილს შორის ფიზიკური დაპირისპირება მოხდა.

დაპირისპირება გაერთიანებული კომისიის სხდომაზე მოხდა და მასში დეპუტატები: ავთანდილ ცინცაძე, ირაკლი ზარქუა, გიორგი ჩაკვეტაძე და ალექსანდრე ხუჯაძე მონაწილეობდნენ.

ხაბეიშვილს დაზიანებები თვალის არეში აღენიშნება.