თურქეთში დღეს მომხდარი ძლიერი მიწისძვრის შედეგად, გარდაცვლილთა რაოდენობა 14-მდე გაიზარდა. ამის შესახებ ქვეყნის საგანგებო სიტუაციათა და სტიქიურ უბედურებათა სამმართველო იუწყება.
უწყების მონაცემებით, რვა ადამიანი პროვინცია ელიაზიგში გარდაიცვალა, ექვსი კი პროვინცია მალათიაში.
მანამდე გავრცელებული ინფორმაციით, გარდაცვლილთა რიცხვი ორივე პროვინციაში ექვსი იყო.
აღმოსავლეთ თურქეთში, ადგილობრივი დროით პარასკევს, 20:55 საათზე, ქალაქ სივრიჯის მახლობლად, ძლიერი მიწისქვეშა ბიძგები დაფიქსირდა, რომლის მაგნიტუდამ 6.8 შეადგინა. მისი ეპიცენტრი 7 კილომეტრის სიღრმეში მდებარეობდა.