ვერცერთი სიტყვა ვერ აღწერს ისეთ შემზარავ და საშინელ მოვლენას, როგორიც ჰოლოკოსტია, მთავრობის სახელით ბოდიშს ვიხდი იმ მოქმედებებისთვის, რაც მაშინ ჩვენმა მთავრობამ განახორციელა, - ამის შესახებ ჰოლანდიის პრემიერ-მინისტრმა მარკ რუტემ განაცხადა.

„როიტერსის“ ინფორმაციით, განცხადება რუტემ ოსვენციმის გათავისუფლების 75-ე წლისადმი მიძღვნილ ღონისძიებაზე გააკეთა.

„საკუთარ თავს ვეკითხებით: ეს როგორ მოხდა. პასუხი კი ისაა, რომ ჩვენ საკმარისი არ გავაკეთეთ. საკმარისად არ დავიცავით, არ დავეხმარეთ“, - აღნიშნა რუტემ.

მისივე თქმით, იმ დროს ადამიანები, რომლებიც სამთავრობო ინსტიტუტებში მსახურობდნენ, გერმანელების ბრძანებებს ასრულებდნენ და ვერ აცნობიერებდნენ იმ შედეგებს, რაც მათ ქმედებებს ამ ადამიანებისთვის მოჰქონდა.

აღსანიშნავია, რომ ეს პირველი შემთხვევაა, როცა ნიდერლანდების მთვარობა მომხდარის გამო ბოდიშს იხდის. ჰოლანდიის ხელისუფლების ოფიციალურ წარმომადგენლებს მეორე მსოფლიო ომში გადარჩენილი, საკონცენტრაციო ბანაკებიდან დაბრუნებული ებრაელების მიმართ არასათანადოდ მოპყრობის გამო ბოდიში მანამდეც არაერთხელ მოუხდიათ, თუმცა ამაში გერმანულ ოკუპაციას ადანაშაულებდნენ და ქვეყნის როლს არ აღიარებდნენ.

ჰოლოკოსტის დროს მოკლული 6 მილიონი ებრაელიდან დაახლოებით 102,000 ნიდერლანდელი ებრაელი იყო.