ბადრი პატარკაციშვილის საქმეზე ურეკის პოლიციის განყოფილების ყოფილი უფროსის, ჯემალ შამათავას უკანონო დაკავებასა და სამსახურეობრივი უფლებამოსილების გადამეტების ბრალდებით დაკავებულ კუდ-ის ყოფილი თანამშრომლები ილია გამგებლი და დავით ქოქიაშვილი კვლავ პატიმრობაში რჩებიან.
დღეს თბილისის საქალაქო სასამართლომ დაკავებულების მიმართ შეფარდებული აღკვეთის ღონისძიება პატიმრობა გადასინჯა და ძალაში დატოვა.
რაც შეეხება ამავე საქმეზე კიდევე ერთ ბრალდებულს, ლევან ქარდავას, რომელიც სხვა სისხლის სამართლის საქმეზე - ე.წ. ნავთლუღის ეპიზოდზე მსჯავრდებულია, დღევანდელ სასამართლო სხდომას არ დასწრებია.
სასამართლო პროცესზე ბრალდების მხარე დაკავებულების მიმართ აღკვეთის ღონისძიების სახით პატიმრობის ძალაში დატოვებას, დაცვა კი, გირაოს შეფარდებას ითხოვდა.
დაკავებული პირებიდან ბრალს არც ერთი აღიარებს. მათ ბრალად ედებათ სამსახურებრივი უფლებამოსილების გადამეტება და განზრახ უკანონო დაკავება.
ბრალის დამტკიცების შემთხვევაში, ბრალდებულებს 9-დან 12 წლამდე თავისუფლების აღკვეთა ემუქრებათ.