თუ უახლოეს მომავალში "ქართულმა ოცნებამ" არ გადადგა კონკრეტული ნაბიჯები, რომელიც დაარწმუნებს დასავლელ პარტნიორებს, რომ ბიძინა ივანიშვილი არ აპირებს დემოკრატიული პროცესის გაუქმებას, ივანიშვილს და მის ხელისუფლებას წინ ელოდება ძალიან მძიმე ხვედრი, - ასე ეხმაურება "ნაციონალური მოძრაობის" წევრი სალომე სამადაშვილი ჟურნალისტებთან ჰალიფაქსის საერთაშორისო უსაფრთხოების ფორუმის ვიცე-პრეზიდენტის რობინ შეპარდის განცხადებებს.
სალომე სამადაშვილი ამბობს, რომ ეს ნაბიჯები საარჩევნო სისტემის შეცვლას გულისხმობს, წინააღმდეგ შემთხვევაში, არჩევნების ლეგიტიმურობა კითხვის ნიშნის ქვეშ დადგება.
"ძალიან ნათლად ვხედავთ, რომ ვაშინგტონში თუ არსებობს ვინმე ვისაც აინტერესებს საქართველო, ყველა თანხმდება ერთ რამეზე, თუ უახლოეს მომავალში "ქართულმა ოცნებამ" არ გადადგა კონკრეტული ნაბიჯები, რომელიც დაარწმუნებს ჩვენს დასავლელ პარტნიორებს იმაში, რომ ბიძინა ივანიშვილი არ აპირებს დემოკრატიული პროცესის გაუქმებას, ივანიშვილს და მის ხელისუფლებას წინ ელოდება ძალიან მძიმე ხვედრი, ეს იყო გაცხადებული ჰალიფაქსის წარმომადგენლის მიერ, როცა ის საუბრობს კონგრესის ზეგავლენის ბერკეტებზე, ეს ბერკეტები არის მრავალი და გულისხმობს როგორც პერსონალიზებულ სანქციებს, ასევე დღევანდელი ხელისუფლების დახმარების შეზღუდვას. ჩვენი პარტნიორები ელოდებიან კონკრეტულ ნაბიჯებს ჩვენი ხელისუფლების მხრიდან, რაც შეეხება საარჩევნო სისტემის შეცვლას. ეს არის მათი მოთხოვნა და ეს კიდევ ერთხელ დადასტურდა უკანასკნელი გზავნილებით. წინააღმდეგ შემთხვევაში, არჩევნების ლეგიტიმაცია, როგორც გვითხრეს, დადგება კითხვის ნიშნის ქვეშ,"- განაცხადა სალომე სამადაშვილმა.
ცნობისათვის, რობინ შეპარდი „ამერიკის ხმასთან“ ამბობს, რომ კონგრესს აქვს ბერკეტები, რომ საქართველოს მთავრობას ცხოვრება გაურთულოს.