რეგიონული განვითარებისა და ინფრასტრუქტურის მინისტრი, ვიცე-პრემიერი მაია ცქიტიშვილი აცხადებს, რომ შესაძლო სამთავრობო ცვლილებებთან დაკავშირებით გავრცელებული ინფორმაცია სინამდვილეს არ შეესაბამება და „ფეიკ ნიუსის“ მკაფიო მაგალითია.
„არანაირ სამთავრობო ცვლილებებს არ ველოდებით. სამწუხაროდ, ოპოზიციური ძალებისა და მათთან დაკავშირებული ტელევიზიების მხრიდან მცდელობაა, რომ მოსახლეობას არასტაბილურობის განცდა შეუქმნან“, - აღნიშნა ცქიტიშვილმა.
რაც შეეხება ლევან იზორიას მიერ საქართველოს უსაფრთხოების საბჭოს მდივნის და დაზვერვის სამსახურის უფროსის თანამდებობის დატოვებას და გერმანიაში, სრულუფლებიან ელჩად დანიშვნას, ცქიტიშვილი აცხადებს, რომ ეს არის ის ცვლილება, რომელიც გააუმჯობესებს ურთიერთობას გერმანიასთან.
„ლევან იზორიასთან დაკავშირებით არავითარ სკანდალს არ აქვს ადგილი, თავისი საქმიანობის განმავლობაში ის კეთილსინდისიერად ასრულებდა მოვალეობას. რაც შეეხება მის დიპლომატიურ სამსახურში მივლენას, ეს იმის გამოძახილია, რომ მას ჰქონდა გერმანიაში როგორც სწავლის, ასევე მოღვაწეობის გამოცდილება და კარგად იცნობს ამ ქვეყანას“, - აღნიშნა მაია ცქიტიშვილმა.