ცივილური, კანონის ფარგლებში გამოხატული ფორმით პროტესტი, მისაღებია, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა ჟურნალისტებთან საუბრისას განაცხადა, რითაც ოპოზიციის მიერ 4 თებერვალს დაანონსებულ აქციას გამოეხმაურა.
მისივე თქმით, კანონის ფარგლებში აზრისა და პროტესტის გამოხატვა ქართველი ხალხის მნიშვნელოვანი მონაპოვარია.
„კანონის ფარგლებში ყველაფერი მისაღებია. თუკი ეს ყველაფერი კანონის ფარგლებს გაცდება, ამ შემთხვევაში, რა თქმა უნდა, იქიდან გამომდინარე რა კანონდარღვევა შეიძლება ჩაიდინოს ვინმემ, შესაბამისი ადეკვატური პასუხი უნდა აგოს", - განაცხადა ანრი ოხანაშვილმა.
ცნობისთვის, „ევროპულმა საქართველომ“ თბილისის მერიას 4 თებერვალს პარლამენტის შენობასთან დაგეგმილი აქციის შესახებ ოფიციალური წერილით მიმართა.